CPI(M)-i Meghalaya Governor mapa nungi anentsütsü akhanger

Shillong, February 22 (Agencies): Meghalaya Governor Tathagata Roy-i Kashmiri nunger mokdangtsü ayongzükba atema pa mapa nungi anenjang ta Communist Party of India-Marxist (CPI-M)-i takhangba agütsür.
President Ram Nath Kovind dangi temepishiba shidi züluba nung CPI-M-i ashiba agi “Meghalaya Governor-i ano maneni ashishitep aketba olen ka jembiogo. Pulwama amakba sülen pai Kashmir aser Kashmiri nunger mokdangtsü ayongzüker. Linük kübok tesem balala nung Kashmiri nunger timtem ajuruba mapang ka nung pai iba olen jembi.”
“Governor-i Constitutional office bena lir aser India President atema teshimtet nübo ka ama pai Indian Constitution ketdangser ka ama inyaktsüla” ta parnokisa ashi.
Meghalaya Governor-i tang mezüng atema iba mesükba olen jembirba masü. Taoba mapanga pai o mashi jembiba ajanga Indian Constitution menentsüogo. Ozüng alema inyakba ya magizüktsüla. India President-i tangsa pa mapa nungi anentsütsüla, ta CPI(M)-i President Kovind dang ashi.
Roy-i iba olen jembiba sülen taoba Jammu & Kashmir chief minister Omar Abdullah-i pa aitsü.
“Tathagata ama nisungtemi Kashmiri nunger medeni Kashmir aginür. Parnoki onok tzüyim nung pongdokdaktsünür. Ajisüaka, pai Kashmiri nunger medeni Kashmir mangutsü” ta Omar Abdullah-i ashi.
Taoba J&K CM Abdullah-ia “Tangar tebilemba magizükertemi Kashmir samatsütsü meranger. Na-a parnok denji dena lir Tathagata” ta metetdaktsü.