CPI(M) lenir Yechury-i Sonia ajurua Tir election atema jembi

New Delhi, April 21 (Agencies): CPI(M) general secretary, Sitaram Yechury-i Congress Tir, Sonia Gandhi ajurua la den Tir election nung opposition party tem longjemer candidate ka shimtsü atema jembiogo, ta osang angazüker.
Yashi Yechury-i Sonia Gandhi lar kidang ajurua liasü.
Yashi Bihar Chief Minister aser JD(U) Tir, Nitish Kumar-i Sonia Gandhi ajurua la den opposition party tem longjemer Tir election atema candidate ka shimtsü asoshi o lemtepba sülen Yechury-ia la ajurua liasü.
Left Party nungi osang ka ajanga, “Yechury aser Sonia Gandhi nati secular opposition party ajaki agizüktettsüa candidate ka shimtsü atema jembi. CPI(M) leniri benokba onük nung Sonia-i telangzüba tajung agütsüogo,” ta ashi.
CPI(M) lenirisa Sonia den NCP tongti, Sharad Pawar aser RJD tongti, Lalu Prasad na indanga süoka jembiogo.
“Kobi melii opposition lenirtem ajurua iba onük nung o lemteptsüa akok,” ta kasa osang ajangasa ashi.
Tir, Pranab Mukherjee ji opposition party tem ajaki Tir candidate shimtsü asü, ta asüngdangba langzüdang, “Party ajaki melungra pa shimtsüa akok. Ajisüaka Mukherjee-i maneni Tir inyakner asü, ibaji tongtibangba,” ta ashi.
Mukherjee Tir inyakba kümsükji taküm July 24 nü tembangtsü. 2012 küm pai NDA candidate asür, P A Sangma madak takok ngua Tir akum.
Tir election nung Mukherjee-i vote lakh 7.13 angu aser Sangma-i vote 3.15 ngua liasü.