CPI(M) onük nung party telung nung meraratsüla: Rahul

Thiruvananthapuram (Kerala), February 10 (Agencies): Bodhbarnü Congress tatong Tir, Rahul Gandhi-i Kerala nung Congress lenirtem dang taruba assembly election nung longjemer tokteptsü ayongzükba den külemi party lenirtem aser state tatong Tir dang West Bengal nung CPI(M) den lokteptsü onük nung meraratsüla, ta ashi.

CPI(M) nungi pilaa alitsüji KPCC Executive senden nung lemteta liasü, iba senden nung Rahul Gandhi aser senior lenir ajaki Left party dakji melung lemtettsü mali ta lemtet.

Ajisüaka Rahul-i onük jembiba mapang ibajibo süoka mejembi, saka party nung inyakertem aser lenirtem dang party sasep nung merarateptsü saka tebong ka küma langer longjemer toktsütsü asoshi metetdaktsüogo.

West Bengal nung Mamata Banerjee-i aniba TMC sorkar atsüngtoktsü nükjidong nung CPI-M lenirtemi Congress den lokteptsü mepishir, aser iba onük nung Kerala Congress lenirtem tsüngda mangatettep adoka lir.

Gandhi-i Kerala nung Congress lenirtem dang, tang mapang ya party telung nung rarateptsü mapang ka masü, anungji longjemer taruba election nung tokteptsüla, ta ashi.

Gandhi-i, “CPI(M)-i Congress tamakok mengudaktsütettsü, Congress-i dang Congress party tamakok ngudaksütettsü,” ta ashi.

Paisa, “State nung senior lenirtem dak sempet kanga tajung keta lir. Ka dak maliba sempet ka dak keta lir. Kija dang nungibo ajakji longjemba tajungba. Ajak dak tashi aser tashimait lir. Ajakji longjema alitsüla,” ta ashi.

“Election tembangba sülenbo ano rarateptsü aika lir. Ajisüaka tangbo rarateptsü mapang ka masü. Tang mapang ya longjema alitsü mapang ka. Ita ka mesüra ana atema teka amteper longjema lidi, aser taruba assembly election nung Congress yimsüsüba tanaben arudaktsüdi,” ta pai ashi.

KPCC Tir, V M Sudheeran aser tatong Tir, M M Hassan natia CPI(M) aija jembia liasü.

Hassan-i Rahul dang, CPI(M) ya temlung lemtettsü party ka masü, anungji parnok den melokteptsüla ta mepishi.

KPCC senden nung taoba mapang defence minister aser CWC züngsem, A K Antony, chief minister, Oommen Chandy, PCC Tir, V M Sudheeran aser AICC general secy-in-charge (Kerala), Mukul Wasnik nungera dena liasü.