CPO & Ao Musical Revival-i asükhu lemsatep

Kohima, Rongjui/September 25 (TYO): Chakhesang Public Organization (CPO)-i, Advisor, Sericulture & Excise, Government of Nagaland, Imtikumzuk Longkumer ajungbena asüba osang angazüka aoksaba lemsatepogo. Pa Apollo Hospital, New Delhi nung Rongjui/September 22 nü asü.
CPO tir Kekhwengulo Lea aser General Secretary Mutsivoyi Kotso nati külem sangdong ka ajanga asükhu lemsatepogo aser ashiba agi, asür Imtikumzuk ya Naga nunger rongnungi nükla aketba lenir ka liasü, shibai taküm aliba mapang pa mapa nung bendanga agüja inyakba ajanga ajaki tetshitsüsa tatishitsü tajung aika sayuogo.
Imtikumzuk ya kanga dang ajemalu aser pei asoshi mebelemi inyakba lenir ka ta ashiba den, CPO pa asüba osang angazüka kanga jashiba aser mang ayimba lemsatep aser pai naga nunger asoshi mapa tajung inyakba Naga nunger mulung nung teti alitsü, ta ashi.
Kasa mapang nung CPO-i, asür nem akhüm tetushi agütsüba den iba amala mangyim tia ka nung asür kibong nem tesenup agüjang ta sarasademtsür aser pa tanüla teti tatem makadak anisüngzükdakjang, ta sarasademtsüba lemsatep.
Kasa mapang nung wapong Imtikümzük Longkümer MLA aser Advisor Sericulture & Excise Government of Nagaland, Rongjui/Sept. 22 2018 aonung ajongbena alima nungi pila aoba angashia kanga sasaa bilemba Ao Musical Revival tayonger Talitemjen Imchen-i sangdong ka ajanga lemsatepogo.
Tulur tilar, lanu tain ajak den kasa litetba yimden lenir ka, alima nungi piladoker ta angashidang, kija aser teloktentet ajak nung tsürena bilemer. Ao Musical Revival 2017 küm ayongba nung par kibong-i shilem tajung agiba bilemteter. Alima-i teti otsü kaket tajung ka küma züngshitsü aser bilemtettsüsa paibo yanglutetogo ta, paisa ashi.