CPO-i tashi angartem dang pelar; Mangartem merenshitsü

Dimapur, January 15 (TYO): ULB election nung tokteptsü atema tenüng agüja alir candidate temi Chakhesang Public Organization (CPO) telemtetba tashi angaa tenüng meyipa agiba atema pelaba metetdaktsür, ta CPO-i tanü Deobarnü sangdong ka nung metetdaktsü.
CPO-isa, “Telemtetba agia aliba ama mapa inyaktsü atema Chozuba Range Public Organization aser Phek Area Public Organization dang January 16, 2017 tashi nung pei telongtet nung tashi mangaba candidate tenüng CPO office tongtsütsü atema tetuyuba ka agütsür,” ta Press Secretary, Wekhrope Marhu aser Vice President, Ariyi Nienu nati sangdong nung shia lir.
Tashi mangartem anema mapa inyaktsü atema Area President, VCCs, GBs, Phek town youth society aser ward Chairman temi Chakhesang Youth Front den yaritepa lanurtem mapa lemtsütsü tuyur, ta CPO sangdong nungsa metetdaktsü.
Maneni, CPO-isa Area/ Range president aser Executives Council Members ajak January 16, 2016 nung CPO office atongtsü atema metetdaktsü.
“ULB election atema mangatettep adokba sülen nungi Chakhesang nunger taginüba anema mapa inyakertem ajak dak CPO-i tenük yoka reprangdar. Nenoki mapang shitak nung angateta memelenshira CPO-i nenok anema mapa inyaktsü,” ta CPO ketdangpurtemisa sangdong nung shia lir.