CPO & Pochury Hoho-i sorkar dang akhanger

Kohima, Rongchii (April) 18 (TYO): Chakhesang Public Organisation CPO) aser Pochury Hoho külem senden ka tawa tu Shilloi Lake Tourist Resort Liitsam nung ayonga amung.
Iba senden nung züngsemtemi Phek District kübok kin ana aser Naga nunger ajak renloktsü aser temetentem kümzüka ayutsü atema maneni meranga inyaktsüla ta tebilemba lemsatep.
Senden nung onük aika benoka olemtepba sülen CPO aser PH nati state sorkar nung bangdak ketdangsertem dang teinyaktsü kar abentsü atema bangzünga renem.
Phukhungri ya International border [Myanmar] nung Administrative Headquarter tongtipang ka lir anungji State Administrative Officer ka teti alitsüla ta parnoki telemtetba agi.
Avangkhu nung International Trade Centre [ITC] aliba nung ajemdaker Phokhungri nung Police Station mesüra State Police Outpost ka alitsüla aser Zhipu adena Akhewgo nungi Avangkhu ITC lenmang yanglutsüla ta parnokisa lemtet.
Avangkhu nung infrastructure den Rest House ama mapatem tembangba den Myanmar nung Lishi jila tashi gari lenmang sendaktepogo anungji International Trade Centre tekaratiba nung lapoktsüla, ta Chakhesang Public Organisation (CPO) aser Pochury Hoho-i sorkar dang ashi.