CRBC Zunpha nung tube well nüngshilong semzüktsü

Dimapur, May 04 (TYO): May 03, 2017 nü Geology & Mining Director, Wanthang Rengma-i CRBC Centre Zunpha, Tseminyu Sub Division nung tang tasen semzükba Deep Tube Well nüngshilong semzüktsü.
Iba sentong nung Executive Secretary CRBC, Haiwalo Apon-a dena liasü.
Nüngshilong semzüktsüba sülen CRBC conference hall nung Secretary Development CRBC, Arhunlo Semp leniba nung sentong tatsüka agia liasü.
Iba sentong nung jembidang Wanthang Rengma-i par Department-i CRBC Centre nung Tube Well takok nuga inyaktetba atema Tsüngrem nem tenüngsang agütsü.
Ano Executive Secretary CRBC, Haiwalo Apon-i, CRBC Centre nung Tube Well yanglutetba ya tamalen pa (Director G&M) inyakdang benokba lir, ta metetdaktsü.
Director-isa Geology & Mining Department nung ketdangsertem aser staff temi Nagaland nung tenem tesemtem nung ‘Ground water’ bushiba aser constructions mapatem nendaka inyakba atema pelaba lemsatep.
Deep Tube Well yangluba indang osang Khikiya Kath Geologist-i metetdaktsü.
(Geology & Mining) for Ground Water Cell Jt. Director, S. Manen Ao-i Nagaland nung Ground water indang jembidang pai, Geology & Mining department-i state nung Deep Tube Well 200 yangluogo, ta metetdaktsüba den külemi paisa, 2017-18 küm nungsa department-i ano Deep Tube Well trok-tenet shi yanglutsü, ta shisem.
Haiwalo Apon Secretary CRBC-i tepela anküp o jembi aser Rev. Isac Kesen Secretary M & E CRBC o Shani Kath Secretary Women CRBC nati tetenzük aser tetem sarasadem agia liasü.