CRHSS Mokokchung silver jubilee among

Christian Residential Higher Secondary School, Mokokchung küm 25 ajungba Silver Jubilee benjung sentong nung Dr. Cynthia Walker USA tongti o jembir aser kaketshirtemi ken atendang tangokba noksa nung angur.

Mokokchung, Mongputeni/Oct. 25 (TYO): Christian Residential Higher Secondary School (CRHSS) Mokokchung October 25 nü küm 25 ajungba Silver Jubilee benjung “Proclaiming the year of the Lord’s Favour” Luke 4:19 omen nung ajemdaker mongogo.

Jubilee omen dak ajemdaker Dr. Cynthia Walker USA ajanga jembidang David chuba küm 37 asüdang temeshi ki ka asütsü tenzük aser pa arishi küm 70 tashi pai iba temekiji tajungtiba nung renemteta Tsüngrem tushitsü inyak aser iba mapang pai nüburtem shisatsü aser teyaria agi aser ibaji ajanga Tsüngrem setsüwangshidaktsü. Yamaji iba school Tsüngremer tetuyuba nung tenzükdang school noktaktettsü asoshi USA, UK aser Sweeden nungi teyari agütsüogo, aji oda süaka ano yangi aliba nüburtemi nungita yaritepba ajanga iba CRHSS ya takok nung noktaka lir ta ashi.

Tongti o jembirisa küm 25 tashi nung iba school nungi kaketshir tajung aika adokteter alitsüta amanger, ano maneni iba school ajanga lanurtem jenti aniteta alima yangluba nung shilem agitsü teimla tulu akarta ayongzüka jembi.

Sentong nung Tsüngrem lenisüba jazüka Rev.Martin Poole, UK ajanga sarasadem, Jubilee Choir-i ken tajung ka aten, Dr.Sentila Ao, Principal Nagaland Bible College ajanga tarur pela agizükba o jembi; Tiala Ao, Co-founder, CRHSS; Artang Ward Chairman Ati Mongro; President, Board of School Management, CRHSS Mayang Ao; Geoff Naylor, UK; Arenlila Jamir, Alumni, CRHSS aser Jane, UK parnoki salem o jembi.

Jubilee nüngo kaket Wilma Naylor ajanga sayatsü aser Asso. Pastor Artang Baptist Arogo ajanga sarasadema sentong tembang. Iba jubilee sentong ya CRHSS nung tesayur Sunepienla Lkr lenisüba kübok agia liasü.