Cricket asayar Jhulan Goswami indang film yanglutsü sangdongogo

Monupii 18, 2018 (Agencies): India nunger nüngtugu saisaponger Milkha Singh, Mary Kom, Mahendra Singh Dhoni aser Mahavir Singh Phogat nunger indang taküm otsü nung ajemdaker film yangluba sülen Sony Pictures International Productions India-i ‘sports biographical dramas’ dak sendakba nung India tetsür cricket team nungi asayar tajung Goswami indang taküm otsü yanglutsü, ta Twitter ajanga trade analyst, Taran Adarsh-i metetdaktsüogo.
“#PadMan aser #102NotOut film ajanga takok tulu ngur külen, nüngtugu cricket asayar Jhulan Goswami indang taküm otsü nung ajemdaker film ka yanglutsüsa ‘Sony Pictures International Productions India’ ket nung temeten lir. Dunamis Entertainment den teka amteper Sony-i #JhulanBiopic film ya yanglutsü,” ta Twitter nung Adarsh-i zülutsü.
Iba film ajanga Goswami-i tila tanur asüdang nungi tajung, tamajung, tejashi aser tepela ajak ajangshia aruba aser tang lai jenjang tulu ngutetba indang otsü ka asütsü. Film otsü ya West Bengal, Nadia tesem nungi aiür chanu Goswami international women’s cricket nung asaya wicket timtiba agir ka akümba indang asütsü.
Pace bowler aser taoba India tetsür cricket team indang captain Jhulan Goswami ya tang tetsür ODI wicket agir rongnung temaba jenjang nung lir. Tetsür cricket asayar rongnung mezüngbuba, saisaponger tetsür rongnung tanabuba aser cricket asayar rongnung tasembuba film otsüji Goswami indang taküm nung ajemdaker yanglutsü.
Taküm Tsüklai (February) South Africa, Kimberley nung India tetsür team aser South Africa tetsür team na tsüngda cricket asayamung tanabuba ODI asaya nung arishi küm 35 tain Goswami-i wicket 200 buba agia otsü yanglua liasü. Ibaji ajanga la tetsür ODI asayar rongnung wicket timtiba agir ka kümogo.