Cricketer Rahane o Rohit nati Arjuna Award agizükogo

New Delhi, September 16 (Agencies): Star cricketer 2, Ajinkya Rahane aser Rohit Sharma nati 2015 aser 2016 Arjuna Award tanü, Hokolbar nü agizükogo.
Delhi yimtiba kübok Jawaharlal Nehru Stadium nung sentong tajung ka agia, India Sports Minister, Vijay Goel-i New Zealand den tan September ita 22 nü nungi tenzüka asaya 3 densemba Test series asayatsü renemba India team nung densemer, Rahane o Rohit na nem nungutu sempetji agütsü.
International asayamong balala nung shilem agiba yong Rahane o Rohit nati Arjuna Award-ji India Tir ket nungi taoba mapang magizüktettsüsa tia ajurua liasü.
“India nüburtemi kanga dang sapuba asaya cricket lir. Ajisüaka, Ato Kilonser, Narendra Modi-i aniba India sorkari tanüngba asayatem jenjanga tajungba kümdaktsütsü asoshi mapatong balala tenzüka lir,” ta Goel-i tanü sentong nung metetdaktsü.
“India asayartemi tawa Brazil kübok Rio de Janeiro nung ayongba Paralympic Games nung takok anguba ajanga India nem konang tulu bener arutsüogo,” ta pai ashi.
1961 küm nungi tenzüka, asayatsü sabang nung tangar dak alia tajungba shilem agiba den külemi, asayatsü sabang nung lenisütsü, asayatsüren aser tazüokba sempet alir asayartem nem Arjuna Awards ya agüja arur.
Rahane o Rohit nati tanü kürakyanglu tila kaka, kulikaket aser senpeta sen lakh 5 tashi agizüka liasü.