Crime branch-i FICN inyakyim putetogo: Guwahati

Guwahati, December 14 (Agencies): State nung sen 60,000 yong sen lakh ka alang Fake Indian Currency Note (FICN) yokteper, ta FICN inyakyim tali züinba osang angashia Assam state police-i bushisüngdang ka asüba mapang kulitem nguteta lir.
Honibarnü Paltanbazar tesem nunga nisung pongui FICN sen lakh 2.50 bener lia police-i apu.
“Sen shibelenertemi FICN sen lakh kaji sen 60,000 agi alizüka parnok noklang nung shilem 40 tajangzük agir,” ta osang ka ajanga ashi.
Iba mapa inyaker telok shia nung teti tetsür aser tanur dena nisung pezü mesüra pongu alir. Tetsür aser tanurtem yagi sen belenba nung yarir.
Sen shibelenertem sen taila ya Bangladesh nungi bener arua Malda, West Bengal nungi belenshir aser ibaji Guwahati-a atonger.
Guwahati atongba sülen telok kar nem sent tera agütsür Dibrugarh, Tezpur, Bongaigaon aser Barak valley tesem kar nung belenshia ayoker, ta ketdangsertemi ashi.
Bushisüngdang ajanga ngutetba agi, ATM nung sen enoktsür nija company nung inyaker-a kar iba ochimashi mapa nung densema lir.
National Investigation Agency (NIA)-i, FICN shibelenertemi linüki sen taila sen crore 1,500 tashi Malda arrtsü ajanga bener aita lir, ta shiogo.
India telungi aitba sen taila timba ka Pakistan nung menüngba lir.