Crimea college bomb lendong nung nisung 18 asü

Kerch, Mongputeni/Oct. 17 (Agencies): Russia-i atsünga aliba Crimea nung bomb tesashi ka apok aser iba lendong nung nisung tajemba agi 18 asü aser ter dak tali yiru.
Peninsula aser Russia na tsüngta Russia-i abu ka yanglua aliba Kerch tesem nung technical college ka nung mejangjaba bomb tesashi ka apok, ta ketdangsürtemi ashi.
Iba lendong ya kaketshir ka mapa lir, ta Russia-i yariba Crimea lennir, Sergei Aksyonovo-i ashi.
Iba lendong atalokdak nungi mezüng osang angashiba nung, iba ya gas mesükba oset kar apok, ta sangdong.
Kaketshir ka pasasa asü, ta Aksyomov-i Russia nunger indang state TV dang ashi.
Iba ya kiralongra mapa ka lir, kong improvised explosive device (IED) apok, ta Russian national guard ketdangsüri ashi.
Iba kiralongra mapa inyakba tesemi National guard unit tem tonga ogo, ta pai Interfax-i ashi.
Iba lendong nung asürtem ya timba technical college nung azünger kaketshirtem liasü, ta iba tesem nung aliba ketdangsürtemi ashi. Iba technical college ya vocational school ka lir aser yangji tanur 850 azünger.
Lendong nung yirur alirtem ya mozükidangi anir ao aser emergency response operation tulu ka tenzükogo.
Yirur alir bener aotsü atema mitkartem tayimtsü pezü tashi renema ayu aser nüngdakba mapang yirur alirtem agizüktsü asoshi mitkartem indang mozüki renema lir, ta Russian Defence Minister Sergei Shoigu-i ashi.
Bushisüngdangertemi osang ka sangdongba nung, iba bomb nung yin inoka liasü aser chiyongba tesem nung apok, ta ashi.
Iba college indang director ya lendong atalokba mapang college nung meliasü, aser lai Russia nunger osangbenertem dang ashiba agi, mejangjaba nisungtem prangbong bener college telungi ait. Lai iba lendong ya 2004 küm Beslan nung school ka amakba den medemdang, kong nisung 330 shi asü.
“Yangji tasümang aika liasü, tanurtem tasümang, chichiba kiralongrari amakba lendong,” ta lai ashi.
Russia-i busemba Crimea lennir, Sergei Aksenov-i Tass dang ashiba agi, bomb apokba sülen injang khaloktsü ta social media nung osang prokshiba ya shidak masü, aser iba tesem nung tensa azüoka lir.
Paisa asürtem atema anogo asem mang ayimtsü sangdongogo.
Iba lendong atalokba sülen yimti nung aliba kaket rejutem ajunga shibang, ta Reuters news agency ajanga ashi.
Crimea ya Ukraine nung shilem ka lir, saka vote agitepba sülen Russia-i 2014 küm atsüng, koba linük aikati aitsü.
Iba sülen Ukraine aser Russia tsüngta tesendaktep mejungi arudagi.
Saka Russia-i busemba Crimean parliament indang speaker, Vladimir Konstantinov-ibo, Crimea nung temenen mapa ajunga Ukraine ketdangsür nungi arur, ta ashir aser iba lendong ya Kiev mapa südi, ta ashir.