Cristiano Ronaldo-i Real Madrid atema goal pongu yok

Madrid, September 13 (Agencies): Honibar nü tan mongpu asoshi mezüng asaya nung Real Madrid-i 6-0 agi Espanyol madak takok anguba nung goal pongubo Cristiano Ronaldo-i yoka liasü.
Portugul nunger Ronaldo-i pai junga asayatetba sempet sayua mezüng goal Luka Modric-i agütsüba pass ka agi yok aser iba sülen penalty tesem nungi Gareth Bale-i agütsü pass ka agi goal yok.
Bale-i pass agütsüba yokba ajanga Ronaldo hatrick 32buba jungogo aser Half-time matongdang Karim Benzema-i agütsüba pass ka goal nung metsüokja iba asaya nung team-i goal pezübuba yok.
Half-time temer külen Ronaldo-i ano goal ana yoksema goal ajak agi trok aküm.
Honibar nü iba takok ajanga Atletico Madrid aser Barcelona na dang nungi point ka agi Real Madrid temaba jenjangi tuogo.
Tan goal trok yokba ajanga Ronaldo-i Raul aser Alfredo di Stefano nunger ajateta La Liga nung pai yokba goal ajak agi 330 jungogo.

You must be logged in to post a comment Login