Cristiano Ronaldo India-i arutsü akok

New Delhi, May 12 (Agencies): India nung football asayamung tulu rongnung ka asayatsü ita pungu shi anünga lia, Real Madrid asayar Cristiano Ronaldo-i India semdangtsü akok ta osang angazüker.
AIFF President, Praful Patel-i ashiba agi, parnoki Portugal nunger nüngtugu football asayar Ronaldo India-i anir arutsü atema mapa inyaker.
“Onoki Portugal Football Federation den jembitepdar. Onoki Ronaldo’er agent den-a tongteptsü meranger. July 7, 2017 nü FIFA U-17 World Cup draw alidang, pa azünga lira India-i arua sentong nung shilem agitsü” ta Patel-i ashi.
India nung Ronaldo sapur aika lir aser pa aruba ajanga FIFA U-17 World Cup asayamung tali ajungkettsü. Pai iba asayamung nung shilem agiba ajanga tereprangertem aika atsür arutsü imlar, ta AIFF President-isa shisem.
Asayamung ayongertemi Ronaldo arutsübaji meshiteter saka parnoki Spain nunger World Cup takok anguba captain Carlos Puyol arutsüba osangbo tejangja metetdaktsüogo.
Carlos Puyol-i May ita India semdangtsü aser October nung tenzüktsü aliba FIFA U-17 World Cup indang ticket ayokba maparen tenzüktsütsü.