Crore 40 ajanga lenmang tajung meyangluteter: Vikheho

Kohima, May 3 (TYO): Centre sorkari Nagaland dak nungi ‘special category fund’ agienba ajanga state nung terenlok asoshi inyakba mapatem nung tetsükdaktsü ajurur, ta Road & Bridges Minister , V. Vikheho Swu-i metetdaktsü.
Iba ajanga takoksa tulutiba ajurubaji PWD (Roads and Bridges) Department lir. Centre sorkari gari lenmang anepalutsü atema 2014 küm Rs. 200 crore agütsüba nungi yaküm Rs. 40 crore dang agütsü aser taküma kasa dang lemzüktsü, ta Vikheho-i ashi.
Tanep Vikheho-i Environment, Forest & Climate Change Minister, Dr Neikiesalie Nicky Kire, Youth resources & Sports, State Lotteries & Music Task Force Parliamentary Secretary, Khriehu Liezietsu aser Chief Engineer (PWD) Tali nunger den departmental ketdangsertemi Kohima nung Public Works Department (PWD)-i anepalua reprangba gari lenmangtem sema senzü.
Minister Vikheho-i aniba teloki Naga Bazaar-Kieziekie-Pezielietsie-Rakabozou-Sepfezou (near Alder College) nung alirtemi gari lenmang yangluba maparen reprangdang.
Parnokisa, Kohima College anasa Kenouzou-i Billy Graham Road den sentaktepba lenmang, Kohima Village circular road, Midland nungi Lower PWD lenmang aser AG-Lerie-Aradhura-New Ministers’ Hill-South Police Station colony tem semdang.
“Onoki tanü sema senzüba ajanga gari lenmang indang tia metetogo aser tanga colony tem nunga jenjang kasa dang alitsü. Ajisüaka, Centre-i Nagaland state nung gari lenmang anepalutsü atema sen crore 40 dang agütsüba agi nübor asoshi lenmang tajung magütsüteter” ta Minister, Vikheho-i osangbener dang ashi.
Department-i tajungtiba nung mapa inyaktsü meranger, anungji public-i khuret angatettsü mepishir. Kohima aser Dimapur dena state kübok jila tongtitem nung Department-i gari lenmangtem yanglushitsü merangtsü, ta paisa shisem.
Gari lenmangtem küm 3-4 tashi meyanglutsüsa Department-i mapa jungjunga inyaktsü merangtsü aser ibaji ajanga senotsüji tanga lenmangtem yangluba nung amshitsü, ta Minister-isa metetdaktsü.