CRPF telok 4 buba All India Police Archery champions kümogo

Manipur’er tetsür telok aser CRPF tebur telok nati Nagaland Home Minister, Y Patton ket nungi takok marok agizükba noksa nung angur. NAPTC stadium, Chumukedima, Dimapur nung 4 buba All India Police Archery championship 2016 tanü, Honibar nü tembanga liasü. (Dimapur, January 23)

Dimapur, January 23 (TYO): CRPF teloki temaba jenjang ngua Dimapur kübok Chumukedima nung tentetba NAPTC stadium nung ayongba 4 buba All India Police Archery championship 2016 champions tanü Honibar nü kümogo.
Par telok sülen anidaka, ITBP o Assam Rifles telok nati overall shilem nung tanabuba aser tasembuba jenjang ngua liasü.
Manipur-tsürtem overall tetsür telok champion aküm aser SSB o TIBP telok nati tanabuba aser tasembuba jenjang angu.
Tan asayamong nung gold 4 aser silver 1 agizükla, Manipur tsür, H. Rajpriyari Devi-i tetsür shilem nung Best Archer sempet agizük aser gold 4, silver 1 aser bronze medal 1 agizüksang, CRPF asayar, Bhagwan Das-i tebur shilem nung Best Archer sempet agizük.
“India linük ajunga nung lasang toktepa kashishir police asayartemi pei sempet tajung sayutsü sabang tajung ka iba asayamong ya lir. Tan asayamong ayongba ajanga kin aser tamangba yimsü balala nungi asayartem ajurutepdakja parnok lungjema alitsü maongka tajung bener arutsüogo,” ta asayamong shibangba sentong nung tongti tesemdanger, Nagaland Home Minister, Y Patton-i metetdaktsü.
“Saisapongtsü shilemtem rong nung lasang toktepa kashitsütsü ya asayar ka indang temang aser tekolok naprongla tajungba kümdaktsüba tongti asaya lir. Tan asayamong nung India nung tentetba state 21 tashi nungi asayartemi kanga junga shilem agiba ajanga nüburtem kanga ajungmesogo. Tan amala asayamong nung shilem agiba ajanga Police asayartemi national aser international sabangtem nunga tangar den toktepa shilem agitettsü,” ta pai ashi.
“Tan asayamong takok ngua ayonga asayaba ajanga India nung tentetba police tenteti linük tenzükba den külemi saisapongtsü sabang nunga tangar den toktepa shilem agiteter ta kuli tejangja sayur,” ta tongti tesemdanger-i shisem.
Tesülen, tongti tesemdanger-i takok angurtem nem takok marok agütsü.
Tanü sentong nung Joint Director, Intelligence Bureau (IB), SS Sidhu-ia o jembia shilem agiba den külemi, Bendang Lemtur (IPS), IG & Organising Secretary-i tan asayamong osang benoka liasü.