CSE-i Delhi nem tenüngsang agütsü

New Delhi, December 05 (Agencies): Honibar nü Centre for Science & Environment (CSE)-i Delhi sorkari linük yimtiba Delhi nung mopung menenba nokdangtsü atema mera takang agiba atema tenüngsang agütsüogo.
Hokolbar nü Delhi sorkari, sangküm January mezüng nü nungi Delhi lenmangtem nung ‘odd’ number plate garitem aser ‘even’ number plate garitem anogo balala nung anogo kaka melentepa senzütsü, ta metetdakja liasü.
Honibar nü sangdong ka ajanga CSE-i, Delhi sorkari yimti nung gari ajema akumtsü aser mokozü ajema kumdaktsütsü mera agiba ajanga yimti nung mopung menenba nokdangtsü asoshi mera takang agiba atema tenüngsang agütsür, ta ashi.
CSE otongdar kati, “Item mera ajanga yimti nung mopung kanga menenba level ajema akumtsü aser anojungi nisung asüba aser shirangba nokdangtsü,” ta ashi.
CSE-isa Delhi sorkari Badarpur power plant shibangtsütsü lemtetba atema tenüngsang agütsüogo.
Delhi sorkari benokba ozüng tasenbaji- odd number (züngdangba 1,3,5,7,9) plate aliba garitem aser even number (züngdangba 0,2,4,6,8) plate aliba garitem anogo lemsar senzütsü. Iba tetezü Delhi nung nija gari ka ita nung anogo 15 dang senzütsü melatsü.
Iba mapatong ya Asia nung China yimtiba, Beijing nungdang benoka lir, aser tanabuba yimtiji Delhi asütsü.
CSE executive director-research & advocacy aser Air pollution control unit tongti, Anumita Roychowdhury-i Delhi sorkar dang mopung menenba nokangtsü atema mera takang agitsü metetdakja liasü.
“Linük yimtiba nung mopung menenba level ji taoksatsüka, aser ibaji ajanga nüburtem anema alibaren nung kongshiba atema rongtak mera agitsüsa akum,” ta Roychowdhury-i ashi.
“Mera tila-la agiba ajanga kecha masütsü. Nüburtemi mopung tajung akhangba ajanga iba telemtetba agitsüsa akum süra, nüburtemi ano taliba nungittsüla,” ta Roychowdhury-isa ashi.