CSK-i ticket ayokba sen tenla agütsütsü

Metsüremi/March 21, 2019 (Agencies): Defending champions Chennai Super Kings puri iba season mezüngbuba Indian Premier League asaya nung aazükba sen Pulwama nung asür sepai kibongtem nem tenla agütsütsü asoshi telemtetba agiogo. CSK captain MS Dhoni-i item kibongtem nem cheque ya agütsütsü.
“Chennai pur IPL nung mezüngbuba asaya atema ticket ayokba sen ajak Pulwama nung asür sepai kibongtem nem tenla agütsütsü. Captain MS Dhoni shiba Indian territorial army honorary Lt. Colonel lir pai cheque ya agütsütsü,” ta CSK director Rakesh Singh-i ashi.
12buba IPL asayamung mezüngbuba asaya nung iba asayamung asemben tashi koker aliba telok CSK aser Royal Challengers Bangalore na MA Chidambaram stadium, Chennai nung asayatsü. Asaya ticket ayokba sen ajak February 24 nü kiralongrartemi amakba mapang asür sepai kibongtem nem tenla agütsütsü.
Pakistan nung amendaker aliba kiralongraba telok Jaish-e-Mohammed (JeM) puri South Kashmir kübok Pulwama tesem amak aser sepai 40 dak tema tepset. Army convoy ka nung CRPF sepai 2,500 shi bus 78 nung mener Jammu nungi Srinagar-i oya aliba mapang February 14 nü kiralongrar kati gari ka nung bomb inoka bener arua pokdaktsü.
Asür nem akümtetushi agütsüba temaitsü India nunger cricket asayartemi tawa Australia den asayaba mapang army korang semer asayaogo aser parnok indang taa National Defence Fund nem tenla agütsü.