CSS atema osangbenertemi shilem agitsüla: Wungtung

February 14, 2019 nü East Gate Hotel, Kohima nung Media workshop ‘Vartalap’ tetenzük sentong nung Advisor, Toshi Wungtung aser tongtibang ketdangsertem adenba noksa nung angur.

Kohima, Feb. 14 (TYO): Tanü IPR, SCERT & Village Guard Advisor, Toshi Wungtung-i, osangbenertemi ochi aser tiyazü osang tebendangji shitettsüla, ta metetdaktsü.
Tanü East Gate Hotel, Kohima nung Central sorkar indang flagship programme indang anogo ka Media workshop ‘Vartalap’ agiogo. Iba workshop ya Press Information Bureau, Ministry of Information & Broadcasting, GoI-i ayongzük, aser iba ama sentong ya küm 20 jungnüa nung tang mezüng ayongzükogo, ta ketdangsertem osang ka ajanga metetdaktsü.
Wungtung-i, sorkar indang programmes aser scheme awareness agutsüba nung osangbenertemi tiyongtsüi ia shilem agitsüla, ta ashi. Paisa, nüburtem nem awareness agutsütsü nüngdak, nüburtem nem iba osang metetdaktsütsü atema osangbenertemi inyaktsüla, ta ashi.
“Sorkar aser nübur tsüngda tongtepratep melira takoksa alitsü, anungji osangbenertem tiyongtsüi ia inyaktsüla,” ta pai ashi. Advisor-isa, awareness junga agutsütsü atema item indangji junga meteta alitsüla, ta ashi.
Kasa sentong nung jembidang Wokha DC, Dr. Manazir Jeelani, Samoon, IAS-i, India ya democracy linük tulutiba lir, ajisüaka nüburtemi shilem magir; nüburtemi shilem magira tapok adoktsü aser linük democracy tashi maittsü, ta ashi.
Iba dak sendakba nung pai, nüburtemi shilem agitsü atema osangbenertemi shilem tuluka agitsüla, ta ashi.
“Tang India nung osangtsüsang agutsüba dang masü saka atangji osangji kanga tongtibang, aser ibaji field-i oa atangji tatalokba osang bendenba ajanga shisangtsü, kechiyong media ya tanüdangtsü ka mesüka lir, koba ajanga loktiliba jenjang sayur aser loktiliba renlokdaktsür,” ta pai ashi.
Paisa, democracy tashi aittsü atema kecha tebendang makai ochi osang agutsüba media ji tongtibang hadir ka lir, aser democracy indang tongti pezübuba ama media ya tashi tait asütsüla, independent asütsüla, ibaji ajanga kecha tetsükdaktsü makai democracy nükjidong alitsü, ta ashi.
Kohima Press Club general secretary, Alice Yhoshu-i, Nagaland nung Central-i sponsor asüba schemes aika benoka inyakaka item schemes benokba departments-iang item schemes indangji tejangja meteta lir, ta ashi.
Laisa, osangbenertem aser nüburtembo yutsür state ketdangsertemia scheme karbo junga memetet, osangbenertemi central-i sponsor asüba schemes aika junga memetet, kechiyong item schemes benoka inyakba department aser media tsüngda shisalemsatep kangabo mali, ta metetdaktsü.
“Kodang inyakyim teladak mesülir aser osangbenertem nem memetetdaktsülir ochimashi mapa inyaktsüsa maongka lir,” ta lai ashi.
Iba dak sendakba nung lai item schemes indang angatettsü atema osangbenertem nem training agutsütsüla, ibaji ajanga osangbenertemi nüburtem nem angatetdaktsütsü, ta ashi.
Technical session nung Administrator, Kohima Municipal Council, Kovi Meyase-i Kohima ‘Smart City’ indang metetdaktsü, Additional Director Social Welfare, Tulula Pongen-i ‘Poshan Abhiyaan’ indang metetdaktsü, Deputy Director, H&FW, Kikameren Longkumer-i Ayushman Bharat’, SDO, Water & Sanitation Support Organisation, PHED, Wonjanbeni Odyuo-i ‘Swachh Bharat Abhiyan’ aser Additional Director, C Philip Yanthan-i ‘Pradhan Mantri Fasal Bima Yojana & Farmers Welfare related Schemes’ indang metetdakja liasü.