CSS/Flagship Schemes kübok ‘engage/hire’ ta ser shimoktsü

Dimapur, March 18 (TYO) : India sorkari CSS/Flagship Schemes inyaktsü atema state nung schemes aser programmes inyaktsü lemzüktsür aser item asoshi Ministry balala ajanga sen lemzüktsür aser iba nungji itasen dena lir, ta Secretary to the Government of Nagaland, Angau I. Thou-i sangdong ka nung metetdaktsü.
Nagaland nunga Department aika nung CSS/Flagship Schemes kübok nisungtem shimoker. Ajisüaka, India sorkari scheme tem tenzüktsüdang, scheme kübok mapa nungi shimokertemji scheme inyaktsü kümsük mesüra mapang den kasa nung shimer.
Anungji, CSS schemes kübok mapa nungi shimokba tiptema aotsü atema, Department temi tamasa P&AR Department aser Finance Department dang nungi temelaba meshir ang Nagaland state nung CSS/Flagship schemes kübok nisung shimoktsü tetuyuba agütsür, ta Angau I. Thou-i ashi.
Sorkar nungi temelaba anguba sülen ang, bangdak Programme Officer temi CSS schemes kübok shimokba inyakyim (fixed tenure mesüra co-terminus with the schemes) indang osang tejangja metetdaktsür ang nisung shimoktsüla, ta laisa metetdaktsü.
Tang nungi Department ajaki CSS/Flagship programmes kübok nisung shimokdang, ‘appointment’ melena ‘engage/hire’ ta asüba olong amshitsüla. Administrative Head of the Department aser Head of the Department temi temalen agüja aliba tetuyubatem ama mapa inyaka aotsü metetdaktsür, ta Angau I. Thou-isa ashi.