CSSWF anenadoktsüla

– Among P. Aier

Metsüremi (March) 12, 2018 nü Nagaland Commissioner office nungi sangdong ka ajanga Nagaland nung sorkar mapa inyaker (temulungertemi) anogo ka sen Chief Secretary’s Special Welfare Fund (CSSWF) nem agütsütsü atema tetuyuba agütsü. Ajisüaka, iba tetuyuba atema nisungtemi aser talisa social media balala nung ashishitepba sülen Metsüremi (March) 13 nü Home Commissioner office ajanga osang jangjashitsüogo. Naga nungertem saru agi lakteter aliba mapang ka nung ano saru ka sarutsü ta osang angashidang kanga tezü tangteper aser talisa iba khuret ya sorkar mapa inyakertemi tuluba ajurur. Anungji, parnok indang itasen nungi anogo ka indang taa dang agizükba jia aika atema shi nung metsüker ama tashi asütsü aser tapok apatsü. CSSWF ya Tsüklai (February) 19, 2016 nü AHODs/HODs senden amendang telemtetba agiba nung ajemdaker tenzük. CSSWF ya Executive Committee ka ajanga ketdangsüa repranger aser parnoki iba Fund ya state nung aser tangalen kija aser teloktem nem teyari agütsütsü atema amshir ta Nagaland Commissioner-i metetdaktsüogo. State sorkar nung Gazetted Officers-i Rongchii (April) 1, 2017 nungi tenzüka pei mulungba tenla agüja iba Welfare Fund ya tenzüktsü mepishia liasü saka senji temulungertemi dang agütsütsü. Tenla agütsütsü memulungba ketdangseri AHoD ajanga Home Commissioner dangi shidi zülutsü akok ta sangdonga liasü. Welfare Fund ya sorkar ketdangsertemi bangzüng renema tenzükba lir aser ano temulungertemi dang sen agütsür. Ano, iba Fund ajanga AIDS Care atema CD4 machines aliogo ta Home Commissioner-isa osang jangjashidang shiogo. Ajisüaka, Metsüremi (March) 12 nü sangdong agütsüba nung state sorkar ketdangsertem mesüra Gazetted Officers ta masü saka sorkar mapa inyaker ajaki ta tetuyuba agüja lir aser itasen nungi anogo ka taaji temulunger nungi dang katizüktsü aser memulunger ta shidi magütsürtem ajak temulungertem ta züngoka katizüktsü ta shia lir. Hao, iba ya mapa tajung ka aser timtemertem/koda masüdang yaritsü nükjidong yur tenzükba Welfare Fund ka lir. Ajisüaka, teyari agütsütsü aser amshitsü atema Nagaland Chief Minister’s Relief Fund ta ser tenzüka lir, anungji Chief Secretary’s Special Welfare Fund (CSSWF) tenzüktsü nüngdak balaka madoker. CM’s Relief Fund ji danga metenzüki ali asübo CS’s Relief Fund tenzükbaji tim dang saka CM indang fund tenzüka lirji CS indang fund ji nüngdak mali. Ano, ibala mapang yariteptsü atema Nagaland nunga Chiteni (July) 21, 2008 nü National Disaster Management Act 2005 agizüka liasü aser iba sülen 2011 küm Home Department kübok Nagaland State Disaster Management Authority (NSDMA) ta ser tentetogo. NSDMA nung chief minister-i anir State Disaster Management Authority (SDMA) aser chief secretary-i anir State Executive Committee (SEC) dena lir. NSDMA nungsa Nagaland home commissioner CEO ama mapa inyaker. Anungji, lendong-tsüdong balala atalokdang aser teyari agütsütsü mapang Nagaland State Disaster Management Authority (NSDMA) nem dang inyakdaktsü nung tajungba asütsü. State sorkari dang NSDMA nem senotsü peria lemzüktsütsüla aser parnok nem teyaritsü tim ajak nung yariteptsü atema tashi agütsütsüla, saka sorkari teyari agütsütsü tenüng amer shinga indang itasen nungi sen katizüka mayutsüla. Tatem nung, Chief Secretary’s Special Welfare Fund (CSSWF) ajanga AIDS agi shirangertem anepalutsü atema CD4 machines aliogo ta Home Commissioner-isa osang metetdaktsüogo, saka ibaji tim masü ama bilemer. Kechiba ta süra, HIV AIDS dak sendakba mapa inyaktsü atema Nagaland nung Nagaland State AIDS Control Society (NSACS) tenzüka lir aser iba ya Department of Health and Family Welfare, Nagaland kübok lir. Anungji, CD4 machines alitsü-a süang mesüra tanga health dak sendakba nüngdaktem-a süang, bangdak department nem ketdangsüa inyakdaktsütsüla. Anungji, Nagaland Commissioner office-i CSSWF indang sangdong agütsüba ajak meyipa agitsüla aser iba Welfare Fund ya anenadoktsüla. Aji ta mesüra, asüng-yanü ano sorkar nung tongti ketdangser mesüra bangdakpur kari iba jilu ajizüka mesüra purapujia mesüra sen bendena agitsü nükjidong nung Welfare Fund balala tenzüktsü aser iba jagi sorkar mapa inyakertemsa timtemdaktsütsü.