CTAN & CEAN-i ‘backdoor appointment’ anema lungkak aiter

Dimapur, December 16 (Agencies): Hombar nungi Combine Technical Association of Nagaland, CTAN aser Civil Engineer Association of Nagaland, CEAN züngsemtemi Nagaland Public Work Department kima nung lungkak aittsü tenzükogo.
CTAN aser CEAN teloktemi RTI ka agütsüba atema telangzüba anguba nung “Nagaland Public Works Department nung S.O Grade-II 29, Surveyor 7 aser Draftman 7 tashi ‘backdoor’ temporary basis kübok mapa nung shimok” ta shia liasü.
Parnok ajak ya advertisement kecha melii aser departmental examination magii June 6, 2016 nungi August 10, 2018 tsüngda shimokba liasü, ta RTI telangzüba nungsa metetdaktsü.
Iba atema CTAN aser CEAN teloktemi February 7, 2019 nü Engineer in Chief NPWD dangi shidi ka nung, anogo 20 tsüngda department nung nisungtemi tim mesüi shimokba anendaktsütsü atema mepishi, saka iba indang telangzüba kecha mangu.
Maneni, parnokisa November 25, 2019 nü shidi ka zülu saka iba atema telangzüba kecha magütsü, saka department-i meyiper November 23, 2019 nü mapa 9 atema advertisement agütsü.
Bangdak ketdangsertemi iba onük atema ola madokba atema tejashi nung teloktemi backdoor appointment agienang ta takhangba agüja lungkak ait.
Tanü CTAN aser CEAN teloktemi memorandum ka agütsü aser iba nung temalen shia aliba nisungtem mapa nungi anentsütsü aser telangzüba mangu tashi departmental exams magitsü atema takhangba agüja lir.
Commissioner & Secretary (Works & Housing)-i December 17, 2019 anepdang 11:00 ako nung parnok den senden ka amentsü, ta Combine Technical Association of Nagaland (CTAN) aser Civil Engineer’s Association of Nagaland (CEAN)-i metetdaktsü.