CTBA YM-i ayonga 1st music festival sentsüwangshia agitetogo

CTBA youth ministry-i ayonga mezüngbuba kentenba benjung nung lanurtemi sentepa aliba nüburtem ayongzüka ken atener. (Noksa tachichi taoba mapang kentener telok Wild Defenders ajanga sentepa alirtem puadakja ken atenba adendang angur).

Mokokchung October 11, (TYO): Ao lima revival tenzükdak aser kentener tajung jenti sotetdak tesem Changtongya Town Baptist Arogo (CTBA) nung Youth Ministry-i ayonga Arogo tenla kidang October 11, 2016 aonung mezüngbuba kenten benjung (music festival) tobur junga sentsüwangshia agitetogo. Süngko shinü aser ozü sangu-temia ken adener aser item jagi asenok dang mongpu balalatem metetdaktsür saka ano ozü kari ken dena arudangbo tasür ajurur ta jembir ibaji medem ken atenba nung tepela aika lir saka kodang alira peladir yangjia timtema lir ta sentong lapoktsür Takowati Language officer Director of school Education, Kohima Nagaland-i jembidang ashi.
Asenoki ken aser oshi tesendaktepji kanga jangja angatettsüla kechibasüra ken karbo kensü tajung saka oren atongtepa aobaji shitak masür aser tetezü madoker, anungji ken mejemertemi ken mejemdang Ao oren atongtepyimji shitak amshia yanglura iba jagia asen Ao oshi tali meraketa tajungba nung aotsü ta paisa ashi.
Paisa ken atenba aser angaba ajanga tepela arudaktsür saka iba nung tekümdangtsü kaji ken tena senzüa kibong balaluyuba, mozü achi tenzükba mesüra item amala mataloktsü kümdangtsüla aser ken atenba nunga mapang amshiyim shitak meteta ora iba jagi asenok nem tajangzük agütsür ta ashi.
Kentenba benjung sentong nung telok telemsa balala Arogotsür choir, Christian Marching group, Old group singer, Silver jubilee choir, Putu kentener, Wild Defenders, Light and salt, Humming bird, Sharon, the choral, Solo-Imlisenla, Male voice, Sungyu zunga, Glee, Pyramid, Mongpu kentener, Animesor, Golden jubilee choir nungertemi shilem agia tesentepertem tzüratemdakja liasü.
Iba sentong ayongzükba ya tesüiba mapang Changtongya nüburtem koda ajaki meteta kentenba nung shilem tajung agia lia aru yamaji iba tsüngsü meraksai jajayonga aotsü lanu asensortem ajungmesoa taliba arangshitsü nükla nung ayongba lir ta CTBA youth ministry nung youth director Imtisünep I Ozükum-i ashi. Paisa iba kentenba benjung takok nung agitettsüa ajaki yaritepba den Tir Yimyim editor K.Temjen Jamir-er kibongi osang prokshiba ajak angati nung adoktsüba aser taoba mapangtem nunga par-isa youth ministry lenla balala nung yaritepba tenüngsanga shia liasü.
Iba sentong ya tang tetenzüker sür taruba mapangtem nungbo iba kentenba benjung kishikina yim-tem nungia jatepba akatsü tebilemba lanurtem nungisa lemsatepa liasü.