CTBC tanurtemi temesepba chiyungtsü anema yimyim ayim

Mokokchung, August 25 (TYO): Ao Baptist Arogo Mungdang (ABAM) tetuyuba ama August 22 anogo Chuchu Town Baptist Church kübok Christian Education department-ia temesepba chiyungtsu anema noktakba temaitsü “procession” ka ayongzüka liogo ta arogo osang ka ajanga metetdaktsü.
Iba sentong nung tesayurtem aser tanurtem dang masü saka town nung EAC-i anir Dobashi-tem, police guards, Khristan lanur, arogo nung toklanga tenzükertem den temulungertemi yaritepa iba sentong takok ngua agiogo ta parnokisa metetdaktsü.
Iba den külemi honibar sentep bendanga agi aser iba sentong nung Dr. Alemwapangi temesepba chiyungtsü dak sentakba nung tekümdangtsü tongtibang onüktem tesentepertem den lemsatep.
Tsüngremi iba anogo tajung moatsüba den shirnokisa iba sentong dak sentakba nung lenla balala ajanga yaritepogo, parnok ajak dang pelar ta kasa sangdong nungsa metetdaktsü.