CTC nung Racism indang National Seminar agir

Mokokchung, November 05 (TYO): Mokokchung kübok Aolijen nung aliba Clark Theological College (CTC) nung ‘The thorn in Humanity’s Coexistence’ omen nung ajemdaker nüburtem bendanga amshiba den sentakba shisadokden sentong ya agitsü tenzükogo.
India nung nüburtem talisa, North East India nung alirtem teprangtsü mesüra tamangba yimsü balala amangba nung ajemdaker bendanga amshiba den sentakba onük balala benoka o lemteptsü nükjidong nung Clark Centre for Peace Research & Action (CCPRA)-i iba sentong ya anogo 2 tashi agitsü ayonga lir.
CTC kübok multi-purpose hall nung agiba tetennzük sentong nung Professor, Christian Theology, Allahabad Bible Seminary, Dr. Samuel George-i tongti onük jembi.
“India nung alirtemi North East India nung alirtem ken o balala nung ajemdaker bendanga amshir. Nisungi nisung bendanga amshibaji shilem ajunga nung temenen lir aser kasaji magizüktsüla,” ta pai ashi.
Tan November ita 6 nü tembangtsü renemba sentong nung shisatsü agütsür balalai omen nung ajemdaker onük 13 tashi lemsateptsü sentong renema lir.