CTN aser Tuli nung election atema action committee shimtsü

Dimapur, Dec.10 (TYO): Nagaland nung taruba ita ana tsüngda Municipal aser town council election alinungji, item election-ji Langpangkong tzükong kübok aliba town council ana Changtongya town aser Tuli town nung timi agitsü asoshi Langpangkong Kaketshir Mungdang Clean Election Campaign Committee (LKMCECC)-i arsangokja arogo, yimten aser lokti lenirtem den tan December 7 nungi 9 tashi tesem balala nung ajurutepa shisalemsatepba den ano lokti sendena dena ayongzüka agiogo.
Item senden nung arogo, yimten aser lokti lenirtemi Changtongya aser Tuli town nung taruba town council election nungi tenzüka assembly election tashi nung nübortemi ochishia aser meraketa election nung shilem agidaktsütsü asoshi “Action Committee on Clean Election,” kaka December 20, 2016 tashi nung shimtsü telemtetba agiogo.
Item committee jagi Chuchuyimlang nung September 03, 2016 nü arogo lenirtem, yimten yimsüsür tatartem, Langpangkong Tzükong Mungdang, Langpangkong Watsü Telongjem aser Langpangkong Kaketshir Mungdang (LKM) nung lenirtem adenshia yur Langpangkong Tzükong nung election timi agitsü lemtetba pangzüngtem mapa küma inyaka aotsü nungloktsütsü.
Item ‘Action Committees on Clean Election Committee’ (ACCEC) jagi election mapang nisung shia pei vote enoktsütsü aser electioni inür ajak pei asoshi masü saka nübortem tenzüktsü ta nangzükdaktsür itettsüsa alima tensa mapang junga yanglutsütsü.
Taoba anogo asem pezüka tsüngda Mokokchung, Changtongya town aser Tuli town nung lenirtem ajurua shisalemsatepdang, Nagaland nung tanü ochishir lenir tajung ka nüngdaker asünungji lanurtem rongnung alima aser nübortem meimerbo election-i aitsüla aser taintem shirnok government mapa nung küm süktema inyaker anener, parnokjibo election-i maitsü ajungshiteptsüla ta tangatetba ka metetdakja liasü.
LKMCECC-isa ashiba agi, tang nungibo Langpangkong nung election-i airtembo yimtsüng aser kin kidong tenüng nung masü saka yimten telok ( political parties) tenüng nung aitsüla. Ano, parnokisa ashiba agi, yimtsüng kari danga pei nübortem pei vote pei mulungba nung meinoktsütettsüsa pei senso candidate shimra, iba yimtsüngjibo ozüng anema kanga mejungi inyakba tesem ka ama shimteta ayutsü aser tapet mapa inyaktsü atema Election Commission of India dang tonga oagi ashitsü.
LKMCECC telokisa ashiba agi, tang town council election agiba ya taruba general election agitsü asoshi tetendangba mapa ka amai asütsü. Parnokisa nübortem dang, lenirtem dang aija mekazüi peisasa pei taküm bushia pei jakla yimya melenshitsü aser pei temeten ayoktsü melen election nung asenoki candidate aser state yarir kaka akümtsüla ta tayongzükba ka agütsüogo.
LKMCECC purtem December 07 nü to Mokokchung nung Langpangkong Senso Telongjem nung lenirtem ajurua kasa tebilemtsü onük nung shisalemsatepa liasü aser iba sülen Changtongya aser Tuli nung arogo, yimten aser lokti lenirtem den shisalemsatepba sentong ka agia liasü. Iba mapang nung parnokia clean election mapa nung akok tashi shilema agia yariteptsü nangzükogo.
Changtongya town nung December 08 nikongdang lokti senden ka ayongzüka Clean Election atema tangatetba agütsüba sentong nung, Wb.Meyionen , Director & DIGP, Vigilance aser Anti Corruption, Nagaland nung tongti o jembia liasü. Pai nübortem den jembidang, peisasa pei taküm yimya melenshir yimten nung ochishia shilem agitsü asoshi ayongzük. Ano paisa, Nagaland nung lanurtemi anir election nung timyimi shilem agiba ajanga nübortem ajaki jangraba yimten yimli tasen ka arutettsü ta metetdaktsü.
Item sentongtem tesem balala nung agidang, LKMCECC züngsem purtem den ano nüngtugu kentener telok ‘ Samaro’ aser jilushi air kanga tushia amshiba lanur telok ka tenüng agi ” DreamZ Unlimited” purtemi Changtongya town aser Tuli town nung shilem tajung agiba ajanga nübortem kanga temoatsü ngua liasü.