CTN nung Handicraft awareness sentong agi

Changtongya, January 31 (TYO): Changtongya nung teka mapa balala inyakertem registration atema January 30, 2019 nü Government High School Changtongya B Compound nung Government of India Ministry of Textiles Handicraft Awareness Programme agiogo, ta akeatdangsertem osang ka ajanga metetdaktsü.
Iba sentong ya Office of the Development Commissioner (H) Handicraft Service Centre (HSC) Kohima Nagaland den COHANDS, New Delhi- 66 nati senteper ayongzükba liasü.
Iba sentong nung jembidang Advisor, Industries and Commerce, NIDC, Imnatiba-i iba ama awareness sentong ayongzükba atema Sr. Assistant Director (H) Handicraft Service Centre, Development Commissioner (Handicraft) GOI, Kohima, T. Rollee Vareishim dang pelaba lemsatep.
State nung nija sector nungbo senotsü timtiba aruba sector ji aluyimba sector lir, iba sülenbo tanabuba jenjang nung mapa timtba angubaji Handloom aser Handicraft sector lir, ta pai ashi.
Changtongya yimdak Craft Village project amenoktsü atema State Industries & Commerce Department-i ministry nem project proposal agutsüogo; iba project nükjidongji tourism dak sendakba nung sobaliba teka mapatem tongtibang ka kümdaktsütsü aser teka mapa balala inyakerem renlokdakja rongsenkettsüng jenjang tajunga kümdaktsütsü asoshi lir, ta paisa ashi.
Iba sentong ya Nungsangnenla, GT leniba nung agi, aser General Manager DIC, Mokokchung Nagaland, T.Lipokwati Ao-i lokti pelaa agizükba o jembi aser Rajib Chandra Roy, Handicraft Promotion Officer, Handicraft Service Centre, Kohima-i tepela anküp o jembia liasü.
Sentong tenzüka Pastor NCRC Changtongya, Rev. C. Manen-i sarasadem aser Sr. Assistant Director (H) Handicraft service centre, Development Commissioner (Handicraft) GOI Kohima, T. Rollee Vareishim-i okila jembia liasü,
Iba sentong nung teka mapa inyaker 460 aden. Mokokchung district kübok teka mapa inyaker tejangrartemia February 15 mesüra iba anogo matongdang register asutsü atema DIC Office Mokokchung nung form agutsütsü akok.