CTN nung SBI ATM mapa meinyaker

CTN. January 09 (TYO) : Linük nung sen 1000 aser 500 tejenba note melendokba ajanga nübortem ATM nungi dang sen terara agizüka pei nüngdak peridaktsüba mapang Changtongya town nungbo SBI ATM majungba ajanga nübortem talila timtem ajurudagi.
Bank nung ketdangseri ashiba agi, sen tasenba agizüktettsüsa ATM nungji oset ka melentsü nüngdaker, ajisüaka ibaji koba tashika nung melentettsüar, ibajibo pai mashi. ATM mapa meinyakba ajanga bank nung nisungtem sen ishika agizüktsü atema mapang talangka atatsüsa akümer aser bank shibangerbo joko sen agizükdak maka akümer.
Sen 1000 aser 500 tejenba note melentsü tenzüker sen 2000 aser 500 note tasen aruba den külemi bank ajak nung ATM dena shitak yanglushia yutsüba agi nübortem kanga anisüngzüker saka Changtongya SBI nungbo iba anisüngzük angudak maka nübortem timtemdagi. Ajisüaka, SBI ketdangseri kobatashika parnok temaba ketdangsertem den tongtepratepda-ar, ajibo mejangjatetter.
Changtongya town ya Mokokchung district nung town tejentiba rongnung ka lir, aser iba town nung Nagaland State Co-operative Bank denbo SBI bank ya dang lir. Ano, tang SBI ATM-ji kanga rongdak nüngdaka akümtsüba mapa kaji, tan January ita 18 nungi Changtongya yimtak AKM lokti senden akatsü sentong lir, aser iba mapang kaketshirtem meyirijang anaasem tashi sendentsü alinungji, parnok atema ATM-ji kanga nüngdaktsü. Itemji administration-i temulung agüja inyaktsüsa town nung alir lenirtemi wainshin meteta anepalutsüla ta kaketshir kati iba osangzülur den jembidang metetdaktsü.)