Cuba linük nung temelenshi bener arur, Fidel Castro süogo

Havana, November 26 (Agencies): United States kishizüng nung communist linük ka yangersang aser Cuba nung temelenshi bener arur, Fidel Castro Hokolbarnü arishi küm 90 nung süogo.
Hokolbar aonung 10:29 ako meta küdi asü, ta Fidel tenu Raul Castro-i state television nung osang metetdakja liasü.
Fidel Castro nem akhümtsübu agüja anogo 9 nü yimkong mangyimytsü ta Cuba linüki sangdongogo aser pa mangji December 4, 2016 nü Santiago de Cuba nung aremtsü ta metetdaktsü.
November 26 nungi December 4, 2016 tashi “public maparen aser sentongtem malitsü, linük wako tom nung ayutsü,” ta state executive sangdong ka nung metetdaktsü.
Fidel Castro ya Putu 20 buba tesadang ka nungi alimai metetba lennir ka liasü. 2006 küm pa tepok nungi timtem tulu ka adok aser iba mapang nungi pa temang mejungi dang aru. 2008 küm pai pa tenu Raul Castro nem Cuba linük ketdangsüba menden agütsü.
1959 nung rara ka sülen Fidel Castro-i Cuba linük madak yimsü asütsü tenzük aser pai küm 49 tashi yimsü süa aru.
Fidel indang noksa tatemsabuba angubaji, tan ita tetenzüklen pai Vietnam President, Tran Dai Quang den ajurutepdang agiba noksa liasü.