Cuba nung Castro yimsüsüba tatem anasai arur

Havana,Metsüremi 11 (Agencies) : Tanü Amungü Cuba nung National Assembly tasenba atema nüburtemi vote agütsüogo aser iba nungji ajemdaker linük nung Tir tasen ka shimtettsü. Küm roker shi tsüngda tan ya mezüngbuba Castro’er kibong sasep nungi mesüi tangar ka linük Tir menden nung amentsü atema vote agütsütsü.
National Assembly nung takok angur züngsem tasentemi arishi küm 86 tain Tir, Raul Castro shiba taruba ita nung pa menden toktsütsü, pa melena lenir tasen ka shimtettsü.
Tedi Fidel Castro shibai yimten tashi rakzüker 1959 küm nungi tenzüka linük yimsü süa aru, pa ket nungi 2006 küm Raul-i Tir menden melenzük.
Assembly menden 605 atema Cuba nunger million troki vote agütsür. “Tawa küm ishika tsüngda agiba tongtibangtiba electionji tan ya asütsü kechiaser onoki tang nungibo onok yimsü asütsü atema nisung tasen shimtettsü,” ta AFP osangden jembidang day-care center guardian Ramon Perez-i metetdaktsü.
2016 küm Fidel Castro asüba sülenbo tanü Amungü ya mezüngbuba general election agir aser iba denji külemi Cuba lima nung lenir tekolakba menden atema tongtibang temelenshi tuluka tenzüka aor asütsü.
“Candidate-temji Cuban Communist Party nungi asütsü/masütsüa akok aser trade union mesüra kaketshirtem rongnungia asütsüa akok. Shirnoki tajungtiba inyaktsü akoker aser nüburtem atema bendanga agüja inyaktettsü, iba nungji ajemdaker candidate-temji shimtettsü,” ta taoba küm election agitsü osang sangdongba mapang Raul Castro-i metetdakja liasü.
“Shingaia vote melena tenangzükba magütsür mesüra pai inyaktettsü akokbatem asüküma shia pa yaridaktsütsü atsür arutsü memeranger; ibaji atangji nung inyaker anungji chichiba ‘socialist democracy’ inyakyim ama onoki inyaktetbaji nüma tanga jembir,” ta anogoshi adokba osangkaket Granma ajanga sangdongogo.
Candidate-temji tesadangka dang nungi teimba tetsürtem (322) lir, Züngsem 31 agi akümba Council of State rongnungi tekolakbaji Cuba Tir inyaktsü shimteter; paji (head) linük Tir akümer.
Aji oda süaka, mezüngbuba National Assembly züngsemtem rongnungi Council of State purtemji shimteter.
Castro ya 2021 küm tashiji tashi tulu aliba Communist Party nung tekolakba alitsü saka term tasen ka inyaktsü atema pai menokdaktsü ta mezüngyongi shiogo.
Pa den mezüng Tadong Tir inyaksang arishi küm 57 tain Miguel Diaz-Canel-i pa melentsü ta nüburtemi bilemdagi.