CVScAH, Jalukie nung outreach sentong ka agi

Dimapur, Yimpoksüi/November 19 (TYO): November 16 nü Outreach Bureau, Kohima-i ayongzüka CVScAH, Jalukie nung ‘India’s Journey of 100 crore Vaccination’ omen nung ajemdaker Integrated Communication and Outreach Programme sentong ka agiogo.

Sentong nung o jembiba mapang College Of Veterinary Sciences And Animal Husbandry (CVScAH) Dean,  Prof. Arun Kumar Sangwan-i, Covid-19 wara ajanga India tashi aser terenlok dak tali temulung lemteta kümdaktsüogo. Wara indang tajangzükji linüki tangbo linük tashi dak kanga temulung lema bilemer, ta pai ashi.

Vaccine crore 100 dak tema agütsüba ya takok tulu ta shia Prof. Sangwan-i, linük nung vaccine agütsüba sentong ya linük atema dang masü saka alima ajunga atema inyakyim khenyongi balaka liasü. Iba vaccine agütsüba sentong yagi asenok tashi angatettsü aser tangar dak memetaloki alitsü atema atema maongka aika agütsüogo, ta pai ashi.

Prof Sangwan-i ashiba agi, wara ajanga entrepreneurs tem nem talisa pharmabiologicals aser vaccination dak sendakba nung parnok dak temulung alemtsü atema tashi agütsüogo. Parnoki tebilemtsü kechi südir süaka koktettsü ta sayuogo.

Vaccine agütsüba mapang tetsükdaktsü ajurubatem indang jembidang pai, vaccine aika yanglutsüji mapa temela masü asü aser nüburtem nem vaccine agütsütsü asoshi nübu aser ajia technical nübu aser nüburtemi vaccine agitsü asoshi mulungtettsü kanga nüngdaka liasü, ta ashi. Paisa, inyakyim aika ka küma longjemer inyakba ajanga vaccine crore 100 dak tema agütsütetogo, ta ashi.

Covid-19 dak sendakba nung olulu osangtem jangjashija shisalen agütsür Dr. Michael Tetseo MO-i, vaccine agiba ajanga timtem dang nungi tajangzük kanga agi timba agütsür, ta ashi. Paisa, Nagaland nung Covid-19 tensa aser India nung agizüker aliba vaccine indang tangazükba agütsü. Iba sentong agiba mapang quiz tetoktepba-a ka ayongzüka agia liasü.