CWC-i Rahul Gandhi dang Congress Tir inyaktsü asüngdang

November 07 nü New Delhi nung Congress tatong Tir, Rahul Gandhi mendenbuba ser Congress Working Committee senden amenba noksa nung angur. Kasa noksa nung party lenir, A K Antony, taoba Ato kilonser, Manmohan Singh, Ghulam Nabi Azad nungera angur.

New Delhi, November 07 (Agencies): Hombarnü Congress Working Committee (CWC)-i Congress tatong Tir, Rahul Gandhi dang Party tongti inyaktsü asüngdangogo.
Congress Tir, Sonia Gandhi temang manemba agi tanü Rahul mendenbuba ser Congress Working Committee (CWC) senden mena liasü.
Party nung bangdak lenirtem senden nung taoba mapang Union defense minister, A K Antony-i Rahul dang Party Tir akumtsü asüngdang. Iba sülen taoba Ato kilonser, Manmohan Singh-ia Rahul dang kasaji asüngdang, iba sülen CWC züngsem ajaki Rahul dang Congress tongti inyaktsü asüngdanga liasü.
CWC-isa Congress tongti, Sonia Gandhi ajurua parnok tebilembaji la nem metetdaktsütsü lemteta liasü.
Iba ya jelia yangluba sentong ka liasü, aser tang mezüng CWC-i Rahul dang Tir akumtsü atema asüngdangogo.
Iba senden nung jembitsü onüktem benokdang Rahul Gandhi-i, tang linük nung democracy inyakyim nung mapang tamajungtiba ka ajangshidar, aser iba nungji, au ta masürtem ajak tebang sorkari nembangtsür, ta metetdaktsü.
Rahul-isa, “National security atema jembiba nung atsükoker lokti tentettem dang tasüngdangba akar. Television channels nem temerenshi agütsür aser parnok dang anentsü tuyur. Sorkar dang tasüngdangba akaba atema opposition purtem apur. Asen temeten ajak sota ayutsü atema iba sorkari linük tashi tim masüba nung amshir. Aser item ajak ya ajanga parnok sentong tamajung takok mengudaktsütsü atema asenok tashi ang itshitsü,” ta ashi.