CWG 2026: Sports Ministry-i Indian contingent 191 agizükogo

New Delhi, Chiteni/July 10 (Agencies): Hokulbarnü Sports Ministry-i Glasgow nung July 23 nungi tenzüktsü aliba Commonwealth Games atema züngsem 191 aliba Indian contingent agizükogo.

Contingent nungya saisaponger 126 aser team ketdangsür 51 alitsü. Ajisüaka Ministry-i Indian Olympic Association indang Executive Committee nung züngsem shima aliba ketdangsüri indokba senotsü memonoktsü ta jangja-jangja shiogo.

Sangdong nungsa contingent indang performance osang tejangja den action photohgraphs tem Ministry nem India-i meyipa shilanger anogo 30 tsüngta agütsütsü shia liasü. India nunger saisaponger 126 nungya tebur 78 aser tetsür 48 alitsü.

“Nisung shiba südir süaka pa/la IOA indang EX nung elected position nung lira, NSF mesüra sports body mashi, shir tenüng team officials list nung inoka lir, parnok atema sorkari senotsü magütsütsü ta IOA-i metettsüla,” ta Ministry ajanga ashi.

Ministry-i team officials nungya coaches, support staff, medical staff aser contingent ketdangsürtem alitsü ta tejangja ashi. Contingent staff nungi Chef de Mission Rohit Rajpal kisüng IOA Executive Committee nung züngsem lir. Ministry totuyuba ya shidak inyakra, pa Glasgow nung amungba sen sorkari magütsütsü.

Tesüiba mapang ketdangsür/saisaponger kar bendang lima nung samaba mechi National Sports Federation-i pei contingents indang tera jungjunga bushitsüla, ta Ministry-i ashi.

Senotsü indokba asadanger Glasgow edition atema Commonwealth Games nung saisapong aika züdokogo. Item rongnung shooting, hockey, badminton, wrestling aser cricket dena lir.

Glasgow Games nung temang shidak alir atema saisapong ter aser para sports trok kisüng alitsü. India ya temang shidak alir indang saisapong toku aser para spors pongu nung shilem agitsü.