CWG Day 5: India nungi asayartemi medal 19 tashi nguogo

Gold Coast, Rongchii 9 : Rongchii (April) 9, 2018 anogo Gold Coast 2018 Commonwealth Games tarep temeyoktep Badmintong asaya nung India nungeri gold medal nguteter tangokba noksa nung angur.

Gold Coast, Rongchii 09 (Agencies): Gold Coast, Australia nung 2018 Commonwealth Games asayamung tenzüker anogo pongunübuba nung India team-i medal tenet bendenloka ajak agi medal 19 tashi ngua lir. Tebur 10m air pistol khashishiba nung India nunger Jitu Rai-i gold medal angu aser külem asayar Om Mitharval-i silver medal ngua liasü. Tetsür 10m air rifle khashishiba final asaya nung India tsür Mehuli Ghosh-i silver medal angu aser 2014 Glasgow asayamung nung gold medal angula, Apurvi Chandela-i bronze medal nguogo.
Shooting: Belmont Shooting Centre, nung tebur 10m air pistol khashishiba tetoktepba nung küm pezü tejaklen Glasgow asayamung nung gold medal angur Jitu-i qualifier nung jenjang pungobuba ngua final tongtet aser asayar 8 den külemi final nung tetoktepba mapang pai ajak agi point 235.1 (Game record) yanglua takok angu. Kasa asaya nung Australia nunger Kerry Bell-i point 233.5 yanglua silver medal aser pa sülen India nunger Mitharwal-i point 214.3 yanglua bronze medal angu.
Küm pezü tejaklen kasa asayamung Glasgow nung asayadang gold medal angula arishi küm 25 tain, India tsür Apurvi-i külem India tsür Mehuli indang (point- 247.2) sülen point 225.3 yanglua bronze medal angu. Iba anogo asaya tatem tashi ka nung India shooting team-i medal tenet tashi ngua liasü. Item medal rongnung tetsür 10m air pistol final asaya nung Manu Bhaker-i gold aser Heena Sidhu-i silver den tebur 10m air rifle nung Ravi Kumar-i bronze medal ngua liasü.
Weightlifting : Carrara Sports Arena 1 nung tebur Weightlifting tetoktepba nung arishi küm 22 tain, India nunger Pardeep-i snatch nung seret 152 aser clean & jerk nung seret 200, ajak agi seret 352 tashi ajungketa silver medal nguogo. Samoa nunger Sanela Mao-i (154 + 206) ajak agi seret 360 tashi ajungketa gold medal ngua liasü. India nunger weightlifting contingent atema Pradeep-i medal anguba ya tokububa lir. Tetsür seret 90 aser seret 90+ telemsa Weightlifting tetoktepba nung India tsür Lalchhanhimi aser Purnima Pandey aser tebur seret 105+ Weightlifting tetoktepba nung India nunger Gurdeep Singh nungertem tsükogo.
Table Tennis: Kasa asayamung Table tennis asaya nung India nunger tebur team-i kanga dang junga asaya Nigeria tebur team madak 3-0 agi takok ngua linük atema tanabuba gold medal angu. Asaya tenzüka India nunger Achanta Sharath Kamal-i Nigeria nunger Bode Abiodun madak 4-11, 11-5, 11-4, 11-9 agi akok. Iba sülen India nunger jenjang temaba nung alisang, Sathiyan Gyanasekaran-i Nigeria nunger Segun Toriola madak 10-12, 11-3, 11-3, 11-4 agi koka India team 2-0 agi tejaklen liasü. Tebur tarep asaya nung India nunger Harmeet Desai aser Sathiyan nati Nigeria nunger Abiodin aser Olajide Omotayo madak 11-8, 11-5, 11-3 agi takok ngua India atema gold medal angu.
Badminton: Tarep temeyoktep badminton asaya nung India team-i Malaysia team madak 3-1 agi takok angu. Tarep temeyoktep asaya nung India nunger Satwik Rankireddy aser Ashwini Ponnappa nati takok ngua gold medal angu. Iba sülen tebur kija asaya nung India nunger Srikanth-i Malaysia nunger Lee Chong Wei madak 21-17, 21-14 agi straight game nung takok ngua liasü. Tebur tarep asaya nung India nunger straight games nung tamakok anguba sülen tetsür kija asaya nung India tsür Sania Nehwal-i Malaysia tsür Soniia Cheah madak 21-11, 19-21, 21-9 agi takok ngua India atema gold medal ngutet.