CWG: India nunger boxer aser wrestler temi medal nguogo

Gold Coast, Rongchii 14 (Agencies): Gold Coast, Australia nung Commonwealth Games asayamung anogo terbuba tetoktepba mapang India boxing congtingent nungi asayartemi medal ajak agi trok tashi ngua liasü. Tetsür seret 45 nungi 48 telemsa tetoktepba nung India tsür nüngtugu boxer MC Mary Kom-i CWG nung mezüngbuba shilem agiba nung takok ngua gold medal nguogo. Kasa mapang tebur javelin throw tetoktepba nung India nunger Neeraj Chopra-i India atema iba asaya nung mezüngbuba gold medal ngua liasü.
Tebur seret 52 aser 75 telemsa boxing tetoktepba nung India nunger Gaurav Solanki aser Vikas Krishan nati gold medal ngua liasü. Kasa mapang India nunger Manish Kaushik (60kg), Amit Panghal (46-49kg) and Satish Kumar (+91kg) nungeri silver medal ang ngutet.
Krishan-i Cameroon nunger Dieudonne Wilfried Seyi Ntsengue madak unanimous verdict nung 5-0 agi koka CWG nung pai mezüngbuba medal nguogo. Iba asaya nung tetendanger pungopronglai Vikas nem point 30-27, 29-28, 29-28, 30-27 aser 29-28 points agütsü.
Arishi küm 35 tain Mary Kom-i arishi küm 21 tain Northern Ireland tsür Kristina O’Hara madak unanimous verdict ajanga 5-0 agi akok. Pungoben tashi world champion angula Mary-i, point 30-27, 30-27, 29-28, 30-27, 20-27 agi takok angu.
Kasa tetoktepba tebur asaya nung India nunger Solanki-i asaya tenzüker mezüngbuba round ana tashi Northern Ireland nunger Brendan Irvine amokbanga asaya liasü. Ajisüaka final round nung Brendan-i kanga tashita Solanki den tsüngtep saka tatemsa Solanki-i 4:1 agi koktet.
India nunger melangteper temi iba asayamung nung ano maneni takok tajung ngutetogo. Telemsa balala toktepba nung India nunger Vinesh Phogat aser Sumit nati gold medal ngutetogo. Vinesh-i Canada tsür Jessica Macdonald madak 13-3 agi koka lai taoba Glasgow asayasmung nung jenjang ngua aliba ano tanaben ngutetogo. Kasa mapang asaya tanga ka nung Nigeria nunger Sinivie Boltic tia makai temmang nung timtem ajurua shilem magitetsa aküm aser ‘walkover’ ajanga Sumit-i iba asaya akok. Taoba Rio Olympic nung bronze medal angula Sakshi Malik-ia asaya ka nung bronze medal ngua iba asayamung nung India team-i medal ajak agi 50 ngutetogo. Tebur seret 86 telemsa toktepba nung India nunger Somveer-i Canada nunger Alexander Moore madak takok ngua bronze medal nguogo.
Badminton
Rogonü (Friday) temeyoktep team tetoktepba nung India-i takok ngua gold medal ngur sülen, Küptoknü (Saturday) India badminton contingent nungi kija asayartemi mezüng medal ngua liasü. Tetsür tarep final asaya nung India tsür Ashwini Ponnappa aser N Sikki Reddy nati Australia tsür Setyana Mapasa aser Gronya Somerville madak 21-19, 21-19 agi koka bronze medal nguogo. Tetsür tarep mezüng semi-final asaya tanga ka nung Ponnappa aser Reddy nati Malaysia team den straight-game agi makok. Temeyoktep tarep asaya nung India nunger Ponnappa aser Satwik Rankireddy na Malaysia nunger Peng Soon Cha aser Liu Ying Goh den 19-21, 19-21 agi tamakok angu. Kasa tetoktepba tebur kija bronze medal atema asaya nung England nunger Rajiv Ouseph-i India nunger HS Prannoy madak takok nguogo.
Iba asayamung final nung tetsür kija tokteptsü atema aikati yongyaa ataba ama badminton asayar mongin India tsür PV Sindhu aser Saina Nehwal na pei tata semi-final asaya koka final tongogo.
Olympic nung silver medal angula Sindhu, la tetsüng nung timtem aliba ajanga temeyoktep tarep toktepba nung shilem magitetti liasü saka kija asaya nung Canada tsür Michelle Li madak minute 26 nung 21-18, 21-8 agi koktet. Kasa semi-final asaya tangka nung taoba world No. 1 Saina-i minute 68 nung 2014 CWG asayamung nung silver medal angula England tsür Kristy Gilmour madak 21-14, 18-21, 21-17 agi kokogo.
Tebur kija asaya nung World No. 1 India nunger Kidambi Srikanth-i ghonda tasadang ka nung 2010 Commonwealth Games asayamung nung silver medal angusang England nunger Rajiv Ouseph madak 21-10, 21-17 agi takok ngua final tongtetogo.
Table Tennis
Tetsür tarep asaya nung silver medal ngur anogo ka sülen, India tsür jenjang temaba nung alila Manika Batra-i tetsür kija final asaya nunga takok ngua gold medal ngutet. Iba asaya nung Manika-i Singapore tsür Mengyu Yu madak 4-0 agi koka liasü. CWG asayamung nung India tetsür kija asayar rongnungi mezüngbuba gold medal angulaji Manika asütsü.
Tebur tarep final asaya nung India nunger Achanta Sharath aser Sathiyan Gnanasekaran nati England nunger Paul Drinkhall aser Liam Pitchford makokba ajanga silver medal ang ngutet. Iba jakdang asaya ka nung India nunger Harmeet Desai aser Sanil Shetty nati ‘straight game’ nung Singapore nunger Yew En Koen Pang aser Shao Feng Ethan Poh madak takok ngua bronze medal nguogo.
Hockey
Bronze medal atema toktepba nung kanga dang tejashitsüka India tebur hockey team-i England nunger tebur hockey team 1-2 agi makok.