CWG nung shilem magitsüla: Jaspal Rana

New Delhi, Metsüremi 17 (Agencies): India junior shooting coach aser taoba mapang nüngtugu asayar Jaspal Rana-i Rogonü linük dang iba asaya 2022 edition nungi aginba aser iba sülen kodanga masayatsü sa jenjang ka nung aliba anemba temaitsü Commonwealth Games nung dena shilem magitsü asoshi shiogo.
Commonwealth Games Federation (CGF) puri shooting ya optional sport ka dang lir ta jangja jangja metetdaktsüogo aser koba linük nung iba asayamung kadir parnoki iba asaya inoksemtsü minoksemtsü ibaji telemtetba agitsü.
CWG otsü nung India nunger shooting asaya nung medal timtiba kokteter aliba linük tanabuba lir. India nunger asayar temi medal 118 kokteta lir.
“Onoki masü saka srokari iba atema nokdaktsüla, kechiyong parnoki India nunger ajungba asaya ka melenshia dang lira linük asoshi ibaji takoksa asütsü,” ta Asian Games nung gold medal pezüben tashi ngur alisang Jaspal-i ashi.
“Asenoki iba tetoktepba nung shilem magitsü koka lir; Commonwealth Games nung shilem tagi. China nungeri Olympics pezü tashi nung shilem magi aser parnok meyipa arur asayaba nung parnoki ajak akok,” ta paisa ashi.