CWG: Sidhu o Chaudhary nati medal tally ajungkettsü

Brisbane, Rongchii 10: Gold Coast 2018 Commonwealth Games nung tetsür 25m Pistol – Final – Belmont Shooting Centre – Brisbane, Australia nung asayaba sülen Gold medalist Heena Sidhu (India), silver medalist Elena Galiabovitch (Australia) aser bronze medalist Alia Sazana Azahari (Malaysia) nunger tangokba noksa nung angur.

Gold Coast, Rongchii 10 (Agencies): 2018 Commonwealth Games asayamung Sangtennü (Tuesday) asaya nung India tsür shooter mongin Heena Sidhu-i ‘tetsür 25m pistol (Precision/Rapid) final tetoktepba nung takok ngua gold medal nguogo. Tebur heavyweight tetoktepba nung India nunger para- powerlifter Sachin Chaudhary-i bronze medal ngua, India team-i medal ajak agi 21 tashi nguogo.
Iba asayamung hopta tatem tashi nung India team-i medal pungo tashi angutsü jangjaogo. India nunger boxing asayar Amit Phangal, Naman Tanwar, Mohammed Hussamuddin, Manoj Kumar aser Satish Kumar nungeri Rongchii (April) 13 nü semi-final asayatsü renema lir aser India tetsür aser tebur hockey team anaprongla semi-final tongogo.
Shooting:
Belmont Shooting Centre nung tetsür 25m pistol final khashishiba nung arishi küm 28 tain India tsür Heena-i asaya amokbanga lai point ajak agi 38 ngua record yanglua liasü. Amungnü (Sunday) tetsür 10m pistol asaya nung lai silver medal ngur sülen iba asayamung nung Heena-i gold medal anguba ya la asoshi medal tanabuba asütsü. 2017 küm asayamung nung Heena-i takok anguba ajanga 2018 Tsüklai (February) Times of India Sports Awards (TOISA) sentong nung lai ‘Shooter of the Year award’ agizüka liasü. Tang tashi nung India nunger shooting contingent-i medal 8 tashi ngua lir.
Para-athletic:
Iba anogo asayamung nung India atema medal tanabuba aser linük nungi para-athletic contingent-i CWG nung mezüngbuba shilem agia India nunger para-powerlifter Chaudhary-i bronze medal angu. Kasa asaya nung India nunger para-powerlifter tanga asem agi final tongtetogo. Iba asaya final nung tokteptsü atema asayar 10 tashi qualify süa liasü aser Chaudhary-i ajak agi seret 181 tashi ajungket. Nigeria nunger Abdulazeez Ibrahim-i gold aser Malaysia nunger Yee Khie Jong-i silver medal angu.
Boxing:
Tebur seret 46 nungi 49 telemsa boxing quarter-finals asaya nung India nunger Amit-i Scotland nunger Aqeel Ahmed madak 4-1 agi koka semi-final tongogo. Kasa tetoktepba tebur seret 91 telemsa quarter-final asaya nung India nunger Tanwar-i Samoa nunger Fans Masoe madak 5-0 agi takok ngua asayaogo. Mapang tatsüka sülen tebur seret 56 telemsa asaya nung India nunger Hussamuddin-i Zambia nunger Muilenga Everisto madak 5-0 agi takok angu. Iba jakdang seret 69 quarter-final asaya nung India nunger Manoj-i Australia nunger Terry Nickolas madak 4-1 agi takok ngua liasü.
Hockey:
India tebur hockey team-i Pakistan team den mezüng asaya nung team anaprongla goal 2-2 nung draw süa tembangba sülen India team-isa Wales madak 4-3 agi takok angu aser Malaysia den Tentonü (Tuesday) asaya nung 2-1 agi takok nguogo. 2014 asayamung nung silver medal anguba team, India-i ‘final four’asaya tongogo. Mapang tatsüka lir külen tetsür hockey quarter-final asaya nung India team-i South Africa team madak 1-0 agi takok ngua tsükdaktsüogo. Iba asaya ‘quarter-pezübuba’ nung India tsür Rani Rampaul-i goal ka idakja India team takoki ani.
Squash:
Tetsür tarep squash tetoktepba nung India tsür Joshna Chinnappa aser Dipika Pallikal Karthik nati Pakistan tsür Faiza aser Madina Zafar madak 2-1 agi takok angu. Iba sülen temeyoktep tarep asaya nung Dipika aser külem asayar Saurav Ghosal na sentepa Guyana nunger Mary Fung-a-Fat aser Jason-Ray Khalil madak 2-0 koka liasü. Pool H tetoktepba tanga ka nung India nunger temeyoktep tarep Joshna Chinappa aser Harinder Pal Sandhu nati Cayman Islands nunger Caroline Laing aser Jacob Kelly madak 2-0 agi takok nguogo.
Lawn Bowls:
Section A nungi Tebur kija lawn bowls round tasembuba asaya nung India nunger Krishna Xalxo-i Fiji nunger Arun Kumar madak 21-11 agi takok angu. Kasa mapang tetsür tarep asaya nung India tsür Lovely Choubey aser Rupa Rani Tireky nati Jersey nunger Rachel MacDonald aser Christine Grimes madak 22-12 agi akok . Tanabuba round ‘men’s fours’ asaya nung India team-i Botswana team madak 16-9 agi takok nguogo.