Cyber Crime Investigation course tembangba sentong agi

Dimapur, Rongjui/September 23 (TYO): Cyber Crime Investigation nung Advance Course tembangba sentong den Nagaland Police Cyber Crime Investigation Manual sayaba sentong ka Rhododendron Hall, Nagaland Police Officers’ Mess, Chumukedima nung September 21 nü agiogo.
Sentepa aliba lokti den o jembiba mapang DGP, Nagaland, T. John Longkumer-i ashiba agi, pa küm ka state nung tenzükba mapang pai mapa kanga junga inyakba ketdangsertem aika nguogo, shirnok department asoshi senti lir. Mapa junga inyaktsüba dak sendakba nung jembidang, pai Nagaland Police force dang lenla ajanga nung linük nung police force tajungtiba ka akümtsü asoshi inyaktsü ajungshi.
Training nung shilem agirtem takok nung tembangba atema parnok nem tenüngsang agüja DGP-i ashiba agi, Nagaland Police Force, Cyber Crime investigation luyim nung parnok ya kanga tongtibang asütsü ta ashi.
SP (Crime), Vishal, IPS, shiba training course Co-ordinator liasü, pai ashiba agi, training ya shilem ana küma lemsar agiogo. Mezüngbuba shilem ya Cyber Crime Investigation awareness programme dak ajemdaker agi aser tanabuba shilem ya Cyber Crime Investigation Module dak ajemdaker agi. Iba training nung state kübok tesem balala nungi police officer 46 nem tangazükba balala agütsüogo.
Maneni iba sentong ya DIG (CID/HR&SJ), Imcharenla, IPS, lenisüba kübok aka aser IGP (CID), Zekotso Mero, IPS-i tepela o jembi. Tanga sentong tem rongnung SP Wokha, Manojkumar, IPS-i Cyber Crime investigation Manual sayaba aser training nung adenertem nem DGP-i kuli kaket agütsüba densema lir, ta ketdangser sangdong ajanga metetdaktsü.