‘Cyber Defender Dimapur 2016’ shisaktoken agi

Dimapur, February 28 (TYO) : Honibarnü Holy Cross auditorium nung ‘Cyber Defender Dimapur 2016’ sentong ayongzüka agi.
Iba sentong nung shisalen sayurji Cyber Security nung mongin nisung Dr. Subhimal Bhattacharjee, Country Head, General Dynamics Internal Corporation liasü.
Iba sentong ya Society for Cyber Security ajanga ayongzük aser school balala nungi kaketshir 400 den timba aden.
Subhimal Bhattacharjee-i o jembidang ashiba agi, cyber security ta asübaji system nung anti-virus ka enokba dang masü saka cyber space nung shilem aika enoksemba lir.
Alima tesem mashii ka nungi cyber attack asütsü akok aser ibaji ajanga second ishika tsüngda data aika samatsütsü koka lir. Tanü alima nung Internet amshir nisung million aika lir aser India linük kija nung million 450 shi lir, ta paisa ashi.
Internet amshir aika akümba ajanga cyber security akangshitsü nüngdaker aser taruba küm 5 tsüngda asenoki iba asoshi mapa inyaktsüla, ta Subhimal-isa metetdaktsü.
Paisa, cyber attackers-i password hack asüba aser temelaba magii tangar account lapokba idang tekümdangtsütem ashi aser kaketshirtem dang Internet amshidang pei indang password jungjunga ayutsü shisem.
Subhimal-i kaketshirtem dang password tasak ayutsü aser kodang pei tenüng, tasoba anogotem amala passaword mamshitsü tekümdangtsü ashi.
Iba sentong nung Bishnu Bhattacharjee, president, NPF Minority Wing Central, Lipok Pongen, ex-DMC member & social worker, Ahidur Rehman, working president, Muslim Council Dimapur nungertemia o jembi aser Swapan Kumar o Yapang Jamir nati technical session agi.