Cyclist Deborah World Number 4 akümer

London, December 11 (Agencies): 2016 Rio Olympics nung shilem agitsü temeten angutsü jenjang tajunga kümdakja, India’er tetsür cycle toktepa anishir, Deborah Herold-i World Elite International Cycling Union (UCI) tarsen nung 4 buba jenjang anguba osang ka UCI-i tanü Hokolbar nü metetdaktsüogo.
Tawa tembanga asayaba Track Asia Cup asayamong nung shilem agiba jakdang Deborah World No. 10 jenjang nung liasü saka lai gold 1 aser silver 2 densema, ajak agi medal 3 tashi iba asayamong nung agizükba yong lai temaba jenjangi atutsü jenjang tajung angu.
Andaman & Nicobar tsürla, arishi küm 20 tain Deborah-i 500m time trial nung ajak agi points 211 ajangzüka World No. 4 akümtsü jenjangji ajangzük.
Deborah-i takok tulu bener aruja kanga junga shilem agiba ajanga India teloka tang World No. 13 jenjang nung aliba osang jangjaogo.
500m time trial shilem nung 15 buba jenjang nung alir, China den temaba jenjang ngua India tang Asia nung tentetba linük rong nung temaba jenjang nung lir.
“Alima tarensen nung ni 4 buba jenjang abentsü maongka anguba atema kanga pelar. India’er cycle toktepa anishirtem rong nung ni tan mezüngsüa iba jenjang tajung ya angur lir. Ni World No. 1 akümtsüsa maneni meranga shilem agitsü temulungtetba yua lir,” ta Deborah-i tanü lemsatepa liasü.
“India nunger cycle toktepa anishirtem indang jenjang anogoshia tajungba akümba atema kanga pelar. Tarutsü nunga India linük asoshi konang tulu bener arutsütsü ta Deborah dak tamang akar,” ta Cycle Federation of India (CFI) nung Secretary General, Onkar Singh-ia tanü sangoktsü.