Cyclone Mora ajanga Mizoram nung ki aika raksatsü

Aizawl, May 31 (Agencies): Cyclone Mora ajanga Mizoram nung Mongolbarnü kongshia liasü aser iba ajanga ki aika raksatsüba den külemi electricity aser telecommunication network tem nung timtem adokdaktsüogo.
Iba den külemi ano yipru den tzünglu tesashi aruba ajanga Mizoram tesem aika nung anentsüh alua nüburtem kangshidar.
Ajisüaka tang tashi nung iba lendong nung nisung asüba osangbo kecha mali.
Aonung sangwaa tzünglu aruba den külemi anepdang tashi mopung ona liasü. Yipru ajanga Myanmar arrtsü nung Khawbung yimtsüng nung ki 20 shi terara raksatsü. Kasa mapang nung Siaha district nung district mozüki ka indang kilem mopung agi ondoktsü aser iba ajanga shiranga mozüki nung monga alirtem corridor nung jenoktsüsa aküm.
Disaster Management & Rehabilitation department nung ketdangsertemi ashiba agi, tzünglu aruba ajanga tesem aika nung anentsüh alua lir.
Parnokisa ashiba agi, lenmangtem tem timba ka tanü merüktetogo saka Aizwal yimti south tsütsü kinük nung lenmang ka melapokteti lir.
South Mizoram, Serkawn yimtsüng nung süngdong ka laoa Arogo sannüker ki raksatsü. Iba yimtsüng ya Baptist Church of Mizoram headquarter lir.
Mizoram Disaster Management Authority aser Disaster Management & Rehabilitation department puri Mongolbar aser Bodhbarnü cyclone ajanga state kongshitsü aliba osang angazüker liasü.
Iba osang dak ajemdaker parnoki state nung cyclone ajanga anentsüh aludaktsütsüba aser tzümetsüng arutsü asoshi imlaba tekümdangtsü nüburtem nem metetdaktsü.
Cyclone Mora ajanga Bangladesh nung nisung 6 bo tepsetogo aser ki aika raksatsüogo.