Cyclone ‘Roanu’ aruba agi NE India nunga tzümetsüng aser anentsüh agi amshitsü

May 21, 2016 : Reuters osang ajanga ashiba agi, Bangladesh nung cyclone ‘Roanu’ aruba ajanga iba osang angashi tashi nung tajemba agi nisung trok süogo.
Anungji iba yipru tulu aruba sülen Northeast India aser Bangladesh tesemtem nung tzümetsüng tulu arutsü aser anentsüh lendong ajurutsü, ta osang kar ajanga metetdaktsüogo.
Tan mongpu tenzüker Honibarnü Bay of Bengal tzüyim nungi mezüngbuba yipru, cyclone Roanu aruba ajanga Chittagong, Bangaladesh nung anentsüh tulu aludaktsü.
Ibala mesükba cyclone ya tzüyim nungi arur aser ali nung kongshidang tashi ajema akümer, ajisüaka Bangladesh nungi northeast India aser Myanmar anülulen o anüdoklentip tsütsü tashi tzümetsüng aser anentsüh agi amshitsü.
Iba yipru aruba ajanga northeast India nung Tripura, Mizoram, Manipur, Nagaland aser Assam anüdoklen tsütsü den Arunachal Pradesh state tema tzünglu aser anentsüh lendong agi kongshitsü.
Tan hopta tzünglu 150-300 mm (6-12 inches) alutsü takzüteta lir aser ibaji ajanga tzümetsüng tulu aser anentsüh lendong kanga bulutsü. Tesem kar nungbo apu tulu aser gari lenmangtema kanga mejungi raksatsü akok.
“Tesem kar nungbo tzünglu  300 mm (12 inches) tashi alitsü,” ta AccuWeather Meteorologist Rob Richards-i ashi.