Cyclone Titli agi Odisha aser Andhra Pradesh na kongshitsü

New Delhi, Mongputeni/October 10 (Agencies): Bay of Bengal nung mopung tesashiba küma cyclone yipru `Titli` kümtetogo aser taruba ghonda 24 nung ano tesashiba akümtsü, ta Indian Meteorological Department (IMD)-i metetdaktsü.
Iba yipru ya asüng (Yangtepnü/October 11) Odisha aser Andhra Pradesh tzüyimkümlen atongtsü.
“Iba yipru ya northwestwards tsütsüleni aontsü aser Mongputeni/October 11 anepdang Odisha den north Andhra Pradesh tzüyimkümlen Gopalpur aser Kalingapatnam na tsüngda ajangtsü,” ta IMD-i sangdong ka ajanga metetdaktsü.
State anaprong kanga kümküma lir aser ketdangsertemi school aser college tem shibangtsü tuyuogo.
Ano tzüyimkümlen ali tenemzük nung alirtem aser ki tamajung nung alirtem danga pei ki yutsür ainshitsü metetdaktsüogo.
Cyclone Titli ji Odisha kübok Gopalpur nungi kilometer 510 shi aser Andhra Pradesh kübok Kalingapatnam nungi kilometer 460 shi pilar lir.
Tanü nungi tenzüka Gajapati, Ganjam, Puri aser Jagtsinghpur district tem nung aliba school, colleges aser anganwadi centre ajak shibangtsü atema sorkari tuyuogo.
IMD-isa Mongputeni 12 anogo nung ango apui tzüyimi maotsü angopurtem dang tuyuogo.
“Onoki angopurtem dang Mongputeni 12 nü angopui maotsü tuyuogo kechiyong tzüyim nung mopungji ghonda nung kilometer 125 kera aontsüa akok,” ta IMD scientist Sashikant-i metetdaktsü.
NDRF aser Orissa Disaster Rapid Action Force (ODRAF) teams den Fire Service sepaitem Odisha kübok district balalai yokogo aser tejenokdak semtu 879 renemogo, ta paisa metetdaktsü.