Cyprus lenirtemi yimjung tezüngzüktep agitsü ajungshir: Ban

Nicosia, November 07 (Agencies): Cyprus linük ajunga tanaben ka küma lungjemshitsü maongka ajangzüka, par lenirtemi sorkar anemertem den yimjung tezüngzüktep agitsü tajungshiba olen ka United Nations (UN) Secretary General, Ban Ki-moon-i tanü, Hombar nü metetdaktsüogo.
“Greek Cypriot Tir, Nicos Anastasiades aser Turkish Cypriot lenisang, Mustafa Akinci nati Switzerland kübok Mont Pelerin nung yimjung senden amentsü tenzüka lir aser par linük maneni pusema nungitsü atema tenati Greece, Britain aser Turkey lenirtem dang metetdakja lir,” ta Ban-i osang jangjashitsü.
“Cyprus lenirtemi tan tsüngdong ajurutepa yimjung senden amenba ajanga alima ajunga nung kin kidong aser iba amala mangatettep ken o nung ajemdaker raratep adokbaren yimjung sentong ayongba ajanga bentetettsü ta kuli tajung agütsüba den alima tesem ajunga nung mangatettep adoka alirtem nem teimla agütsür lir,” ta UN-i ayonger Mont Pelerin nung anogo 5 agia amentsü tenzükba yimjung senden tetenzükba anogo nung Ban-i tanü metetdaktsü.
Tanga tetsükdaktsü kecha majurui parnoki par yimjung senden takok ngua amentsü nükjidong nung Cyprus lenirtemi tan bendang linük ka nung par yimjung senden amenba osanga angazükogo.
Greece linük den meloktepdaktsütsü nükjidong nung Turkey linüki 1974 küm Cyprus tashiyim agi agitsü merang aser iba sülen Mediterranean anüdoklen tentetba asetkong linük, Cyprus nung alir nübur telok ana küma loksatsü tenzük.