Cyril Ramaphosa South Africa tir kümogo

Cape Town, Tsüklai 15 (Agencies): Mangatettep agi sünga alisang, Jacob Zuma-i menden toktsüba sülen Cyril Ramaphosa South Africa tir kümogo.
Parliament nung Yangtepnü tir menden atema candidate nominate asüba pa kisüng liasü, anungji pa tir akümtsü asoshi vote kata menüngdaki aküm. Iba osang sangdongba sülen South Africa nung sorkar denteta aliba telok, African National Congress (ANC) nungi Parliament züngsemtem tepela agi ken aten.
Parliament nung jembiba maoang arishi küm 65 tain, Ramaphosa-i sorkar mapa nung ochimashi inyakba metetogo, ta ashi.
ANC-i Zuma dang menden tokjang mesüra vote of no-confidence agitsü, ta shia liasü.
Television ajanga sangdongba mapang Zuma-i menden toktsür saka par party telemtetba magizüker, ta ashi.
Sorkar mapa nung ochimashi mapa aika inyakba nung Zuma ya ajia lir, saka pai mapa tai kicha meinyak, ta tekong meranga arur.
Yangtepnü iba telemtetba agiba mapang opposition party, Economic Freedom Fighter kilung nungi alu. Parnoki tir tasen ya ANC ajanga shimtetba masü saka election tasen aginü.
South Africa nung ANC teloki 1994 küm sorkar akümba mapang nungi Ramaphosa ya tir inyaknüa aru, ta ashir.
Nelson Mandela-i pa melentsü asoshi Ramaphosa meshiemtetba ajanga pai yimden toktsür shishilembaba nung temulung agütsü, ta ashir.
Saka Ramaphosa-i indang pongmang asangsang kümogo.
Ramaphosa-i mezüng South Africa nung rongsenketsüng ajungkettsü, ta shiogo, saka ibai kanga temelabo masütsü, kechiaser par linük nung unemployment ya shilem 30 jungnüa lir.
Terenlokba nung kanga ajemba aser investor tem temulung mulutetba ajanga South Africa nung rongsenketsüng tsütsü kanga ajema lir.
Investor tem temulunu uludaktsütsü asoshi mezüngbuba nung sorkari ochimashi inyakba mapatem anendaktsütsüla.
Zuma ya taoba mapang ANC military wing nung züngsem ka liasü aser pai South Africa ya kümsük asem dak tali aniogo.
Saka pai tir menden toktsüba mapang maksü agi pa müketbanger anener aser South Africa indang rongsenketsüng jenjang tamajung nung yutsür.
Rasemnü police temi Johannesburg nung tashi tait aser takar kibong, Gupta’er indang ki mita bushi.
Taila mapa inyakba aser senotsü tim masüba lenmang nung amshiba nung aija alir nisung ti tashi Yangtepnü court dangi aru saka iba mapang Gupta’er adianu Ajay, Atul aser Rajesh nungerbo meliasü.
Court-i arur rongnung Varun Gupta densema liasü aser pa ya Gupta’er indang mining firm, Oakbay Resources & Energy nung Chief Operating Officer lir.
Gupta ya tir den medemer asüba maongka amshia inyaksangshi aika nung tajangzük agi, ta aija lir. Saka telok anaprong nungi iba ama meinyak, ta ashir.
Cyril Ramaphosa ya 1974 aser 1976 nung anti-apartheid mapa inyakba ajanga tepuokdak ayu.
1990 küm Nelson Mandela tepuokdak nungi chioktsü asoshi renemba committee nung pa mendenpuba liasü. Pai Mandela melena tir inyaknü, saka Thabo Mbeki ang shimtet. Oba sülen pa 1997 küm yimdenren toktsür shishilembaba nung tetsüng ajemoka South Africa nung aliba takartem rongnung ka aküm aser 2017 küm ANC lenir shimtet.