D.El.Ed tatidang agütsürtemi Inspector of Schools dak teka sangshi

Guwahati, Luchii (December) 21 (Agencies): Assam nung Hailakandi Inspector of Schools Rajiv Kumar Jha-i D.El.Ed examinations agütsürtem ajizüktepa züluba noktangtsü merangdang tatidang agütsürtemi pa dak teka sangshi aser iba ajanga iba centre nung tatidang agiba thinen.
Brihostibarnü Jha-i Premlochan High School, Mohanpur semdangdang tatidang agütsür aika ajizüktepba züluba aser mobile phones amshiba angu. Pai tatidang agütsürtem noktangtsü merang saka meyiper parnoki pa dak teka sangshi. Iba mapang centre coordinator-ia Jha kümzüktsü merang saka pa dak-a teka sangshi.
Iba mapang examination centre nung mapa lemzükja aliba police temi tensaji azüok aser ajizüktepa azüluba sheets o mobile phones ajak police-i apu.
Idangjisa Jha-i district administration ketdangser nem osang sangoktsü aser iba centre nung tatidang agiba athi.
Tang tashi nung iba dak sendakba atema FIR ka danga mebenok saka police-i bushisüngdang südar.