DAAPYT-i ayongzüka SHABACH sentong agiogo

Dimapur, Metsüremi/March 15 (TYO): Dimapur Area Associate Pastor Youth Telongjem-i ayongzüka March 14 nü nikongtsütsü 5 ako nungi tenzüka Agri Expo nung “SHABACH: An Evening of Praise” sentong takok ngua agiogo.

Iba sentong nung Dimapur temeket nung aliba Ao Arogotem nungi lanur 2000 dak temai shilem agia liasü. Küm aika jakdang nungi Dimapur nung aliba Ao Arogotem nungi lanurtem küm nung kenbo telongjem sentep (Combined Service) agia arudar.

Item sentongtem ajanga asen Aor lanurtem tali longjemdaktsüba den parnok sempet tajung ajanga Tsüngrem sentsüwangshidaktsür. Taküm asoshi moapu ka nung ‘Tekülem Benjong’ agitsü mulungteter yonga ata aliba ama sentong takokba aser temoatsü tulu nung agiogo.

SHABACH sentong nung DAAPYT tir Tali Jamir-i lokti pela agizükba o jembi aser Ao Baptist Arogo Diphupar Pastor Rev. Dr. N. Lipok Jamir-i Tsüngrem temaotsü meshizüka sarasadema liasü.

Sentong nungsa, Aoyim Baptist Arogo nungi Associate Pastor Youth Pur aser Dhansiripar Ao Baptist Arogo Associate Pastor Youth Matsüngla nati taküm kuli lemsatep, Associate Pastor KABA Arep Tzüdir-i Tsüngrem o jembi aser tepela anküp o den tatem sarasadem Convenor Sunep Sempo-i agia liasü.

Sentong nung tongti o jembir Arep Tzüdir-i, Tekülem indang Tsüngremer tarensen nung jembia liasü. Paisa, Tekümzükba (Redemption), Temeshiba (Righteousness) aser Tekülem (Worship) indang jembi. Tsüngrem atangji nung külemtsü asoshi temeshiteba nung jajatsü nüngdaker, aser iba asoshi Tekümtet nungdaker, ajisüra shitakba tekülemji sütetsü, ta pai ashi. Pai, tanü lanur putu ya ‘filtered culture’ ka lir, tema nungbo teburjunga shitak inyaktsü saka telung nungbo shizüka aoba taküm lokti aser Arogo asütsü akok, ta ashi. Arep-isa, tanü tamangertemji ‘Christless Christian aser Crossless Christian’, kechiyong Tsüngrem tsübuba asenok dak mali’ ta paisa shisema tarur ajak ayongzüka liasü.

Iba kenten sentong nung shilem agiba lanurtem, tekülem aser tetushi ken den taküm kuli aser Tsüngrem o ajanga kanga temaotsü ngua liasü.