DABA nung 1 buba North East India Transformation Congress amener

Dimapur, November 03 (TYO): Council of Baptist Churches in Northeast India (CBCNEI) aser Evangelical Fellowship of India (EFI) nati aroki ayonger külen Ao Baptist Arogo Mungdang (ABAM) kübok Dimapur Ao Baptist Arogo (DABA)-i ketdangsüa, tang mezüngbuba North East India Transformation Congress DABA tongti tenlaki, Dimapur kübok Duncan nung amen tenzükogo.
“North East India nung mission mapa inyaker Arogo aser Khristan tamangba yimsü yimya balala benshir jenti lir aser item Arogo aser tamangba yimsü yimya balala benshir rongnung mission mapa asentenshia inyaktsü nüngdaka kümogo. Alima talisa, North East nung mission inyakyim melenshitsü tenzükba mapang ka ajurutsü tenzüka lir aser iba temelenshi den tapet süa, Tsüngrem’er mission inyaktsü tangatetba aser inyakyim melenshitsüla,” ta tongti onük jembir, CBCNEI nung General Secretary, Rev. Dr. Solomon Rongpi-i sangoktsü.
‘Asenoki tanaben shisadangdi – Isaiah 1:18’ omen indang jembia, kanga dang taochi aketba aser temeim aliba Tsüngrem-i Israel nüburtem Pa dangi tanaben jaoka, Israel linük tasen küma melenshitsütsü atema tanü putu  nunga inyaktsüsa Tsüngrem dak tashi aliba olen ka pai lemsatep.
“Asenokia tali shisadanga Tsüngrem tenzüktsü, temelenshi bener arütsütsü aser North East India nung kechisarena ajunga tasen küma melenshitsütsü tasa aser lenmangtem bushitsü nükjidong nung Tsüngrem tenzüker kaka ama tanü sentepa lir,” ta pai shisem.
“Asen Arogoi Tsüngrem’er mission inyakbaren tanaben reprangshitsü ayongzüker. Asen tai nangzüka, Tsüngrem dangi tanaben meyiptsü nungdaker ta aikati meshisateti lir. Yisu Khrista Osangtajung ajanga temelenshi tajung bener arutsür kaka akümtsü asoshi aseni tanaben nangzükshitsü ajungshir,” ta shia, North East India nung Arogo aser lokti tentet balalai ajurushia aliba tebilemtsü khuret bentettsütsü nüngdakba olen ka Rongpi-i metetdaktsü.
Ano  külen, anogo 4 agia amentsü ayongba mungdang nung North East state balala nungi Arogo, Khristan tamangba yimsü yimya balala benshir aser tentet balala nungi shilem agirtem pela agizükba olen ka DABA Pastor, Dr. N. Tzudir-ia lemsatepa liasü.