DABA nung ‘The Morung Lectures’ kübok shilem ka agi

Dimapur, April 2 (TYO) : ‘The Morung Lectures’ nung shilem ka ama, Honibarnü Elim Conference Hall, DABA, Duncan nung ”Human Rights in Naga Society: Today & Tomorrow’ lecture ka ayongzüka agi.
Iba sentong ya The Morung for Indigenous Affairs and Just Peace, aser The Morung Express nati ayongzüka agi.
Sentong nung Naga Peoples’ Movement for Human Rights, Secretary General, Neingulo Krome aser Japfü Christian College Principal, Dr. Visakhonü Hibo nati meimchir temeten anema inyakba onüktem jembi.
Tarutsü nung loktiliba jenjang tajungba kümdaktsütsü nükjidong nung shisaluyimba dak sendakba nung meimchir temeten indang aika benoka lir, ta Dr. Visakhonu-i tanü o jembidang ashi.
Naga nunger loktiliba nung yimtenren ajanga masü saka tangatetba ajanga nübortem amokbanga lir aser ola madokteter. Kecha masüba sensotem kümzüka ayutsü atema ozüng yanglua mali aser iba jagi nübortemi ola adoktsü tsübur. Asen loktiliba nung meimchir temeten mali kümogo, ta laisa ashi.
Asen kilung nungi meimchir temeten ajungkettsü atema mapa inyaktsüla aser tangar akhümtsübutsü tangtatetba adokdaktsütsüla. AFSPA ajanga tesentaktep yanglutsü melena teraksa ang jenti bener arutsüogo aser ibala mesükba system ya melenshitsüla, ta Dr. Visakhonu-isa ashi.
Sentong nung NPMHR Secretary general, Dr. Neingulo Krome-i o jembidang, “nüjiso aser linük meimba tenüng nung asenok ola madoki kanga timtemogo” ta ashi.
Asen state nung meimchir temeten amokbanga lir aser iba asoshi asenoki ola madoki tangar dak tai tongloktsüba yimya agientsüla. Ajisüaka, lanuputui meimchir temeten dak sendakba onüktem asoshi inyaktsü teimla lir, ta Dr. Neingulo-isa metetdaktsü.
Iba sentong nung onirtemji The Morung Express nungi Aheli Moitra aser Moa Jamir na liasü.