DABA sannüker Rev.N.Tzüdir mapa nungi anen

Dimapur, April 15 (TYO) : Dimapur Ao Baptist Arogo (DABA) nung Rev.Dr. N.Tzüdir sannükba mapa nung küm 36 tashi inyaka arur külen mapa nungi anenogo.
Tanü amongnü DABA tenla ki tuluba nung temoatsü sentep mapang pa mapa nungi anenba sentong nung jembidang, ‘sannükba mapa ya Tsüngrem tenzükba mapatem ajak rongnung tetenzükdak aser tongtibangba,’ ta Rev.Dr.N.Tzüdiri metetdaktsü.
Pa sannükba mapa inyaktsüba ya Tsüngremi pa den pai angashia jembiba mapa ka liasü ta paisa ashi. DABA ya Mission mapa inyaktsü nangzükba arogo asünungji, alima ajungalen samaa aliba tanüla anir aruba mapa nung North East atema DABA ya tongtibang tesem ka akümtsü imlar ta Rev,.Dr.Tzüdir-isa metetdaktsü.
Pa sannükba mapa inyaktsü maongka angubaji par tsürabur tamang aser takok ngua inyaktetbaji pa kinungtsü, tanurtem aser külem tenzüker aser amangba purtem teyari ajanga liasü ta paisa parnok nem tenüngsang agütsü.
Rev.Dr.N.Tzüdir ya 1982 küm June 13 nü Dimapur Ao Baptist Arogo nung Assistant Pastor cum Home Evangelist inyaktsü asoshi shima mapa tenzük. Iba mapangbo DABA nung Fellowship ana dang liasü aser züngsem 583 dang liasü saka tangbo DABA kübok kibong 6000 shi aser nütsüng 15,982 lir.
Pa 1987 küm January 7 nü Wt.Imtimongla den kibong aküm aser tang tena nem jala ana aser jabaso ka moaja lir. Pa 1992 küm November 22 nü ordain asü aser iba sülen 1998 küm sannükertem rongnung temaba jenjang sannükba mapa inyaktsüsa maongka angu.
Rev.Dr. N.Tzüdir ya CTC nung B.Th zünger sannükba mapai ai aser mapa teinyakdak nung 1986 küm Bishop’s College, Kolkata nungi BD renem aser 2016 küm Doctor of Ministry jenjang nguteta inyak.
Tanü pa nem akhüm agüja mapa nungi anenba sentep sentong nung arogo tenüng nung tebu tedi I.Pangjung Lkr. Deacon-i jembi aser Baptist Pastors’ Fellowship Dimapur purtemia tenüngsang o metetdaktsü. Iba sentep sentong nung DABA nung Associate Pastor, Rev. Maong Lemturi Tsüngrem o jembia liasü.